पर्यावरण चळवळीच्या माध्यमातून राजकीय भाषण? ग्रेटा थनबर्गच्या हातातील माईक हिसकावला, ‘त्या’ घटनेने जगभर खळबळ!

हवामानविषय कार्यक्रमाचे थनबर्गने राजकीय कार्यक्रमात रुपांतर केल्याचा आरोप या व्यक्तीने केला. “मी इथं हवामान चळवळीसाठी आलो होतो, राजकीय कार्यक्रमासाठी नाही”, असंही त्याने ग्रेटाला उद्देशून म्हटलं. व्यासपीठावर पोहोचताच त्याने थनबर्गकडून माईक काढून घेण्याचा प्रयत्न केला. त्यानंतर त्यांच्यात झटापटीही झाली. परंतु, व्यासपीठावरील इतर कार्यकर्त्यांनी त्या व्यक्तीला बाजूला केले. यावेळी ग्रेटा स्वतः त्याला शांत होण्याचं आवाहन करत होती.

हेही वाचा >> गाझातील रुग्णालयात मृत्यूतांडव, वीज-पाणी-इंटरनेट खंडित; WHO कडूनही आता युद्धविरामाचे आवाहन

याबाबत ग्रेटा म्हणाली की, हवामान न्याय चळवळ म्हणून ज्यांच्यावर अत्याचार होत आहेत आणि जे स्वातंत्र्यासाठी – न्यायासाठी लढत आहेत त्यांचा आवाज आम्हाला ऐकावा लागेल. अन्यथा, आंतरराष्ट्रीय एकजुटीशिवाय हवामान न्याय असू शकत नाही.

या कार्यक्रमात तिने पारंपारिक पॅलेस्टिनी स्कार्फ घातला होता. याला केफियेह म्हटलं जातं. ही घटना घडण्यापूर्वी जमावाकडून ‘पॅलेस्टाईन मुक्त होईल’ असा नारा दिला होता, असं वृत्त बीबीसीने दिलं आहे. तर, ‘नदीपासून समुद्रापर्यंत पॅलेस्टाईन मुक्त होईल’, असाही नारा दिल्याचे वृत्त रॉयटर्सने दिले आहे. दरम्यान, या व्यक्तीची ओळख पटली नसून त्याच्या जॅकेटवर Natuurlijk असं लिहिलं होतं.