पीटीआय, नवी दिल्ली लडाखच्या लोकांचे जीवन सुखकर बनवण्यासाठी आपले सरकार शक्य ते सर्व प्रयत्न करेल, असे आश्वासन पंतप्रधान नरेंद्र मोदी यांनी रविवारी दिले.वर्षांच्या कुठल्याही मोसमात लडाखला जाणे शक्य व्हावे यासाठी १६८१.५१ कोटी रुपये खर्चाच्या शिनकुन-ला बोगद्याच्या बांधकामाला मोदी सरकारने मंजुरी दिली आहे. ४.१ किलोमीटर लांबीचा हा बोगदा २०२५ पर्यंत बांधून पूर्ण होणार आहे, असे ट्वीट लडाखचे खासदार जामयांग त्सेरिंग नामग्याल यांनी केले होते. त्याला टॅग करून मोदी यांनी हे वक्तव्य केले. ‘लडाखचा सर्वात मागास भाग असलेल्या झांस्कच्या लुंगनाक खोऱ्यातील रहिवाशांनी या निर्णयाचे स्वागत करून त्यासाठी मोदी यांचे आभार मानले आहेत’, असे खासदार नामग्याल यांनी या ट्वीटमध्ये नमूद केले होते.
