परवेझ मुशर्रफ पाकिस्तानात परतणारच

माजी पंतप्रधान बेनझीर भुत्तो यांच्या हत्याकटाप्रकरणी पाकिस्तानचे माजी अध्यक्ष परवेझ मुशर्रफ यांच्याविरोधात ‘रेड कॉर्नर’ नोटीस बजावण्यात यावी ही पाकिस्तानी सरकारची विनंती इंटरपोलने धुडकावून लावली आहे. ही विनंती निव्वळ राजकीय हेतूने प्रेरित असून मुशर्रफ यांच्याविरोधात अशा प्रकारची नोटीस बजावता येणार नसल्याचे इंटरपोलने स्पष्ट केले आहे. त्यामुळे पाकिस्तानात परतण्याचा मुशर्रफ यांचा मार्ग प्रशस्त झाला आहे.
पाकिस्तानात होऊ घातलेल्या सार्वत्रिक निवडणुकांत ऑल पाकिस्तानी मुस्लिम लीग या स्वपक्षाच्या प्रचारार्थ व निवडणुकीत सहभागी होण्यासाठी मुशर्रफ यांची मायदेशी परतण्याची तयारी सुरू आहे. मुशर्रफ यांच्या या प्रयत्नाला सुरूंग लावण्यासाठी पाकिस्तान सरकारने त्यांना बेनझीर भुत्तो हत्याप्रकरणी गोवण्याचा कट रचला आहे. या कटाचा भाग म्हणून इंटरपोलने मुशर्रफ यांच्याविरोधात रेड कॉर्नर नोटीस बजावून त्यांना अटक करण्याची अनुमती द्यावी अशी विनंती पाक सरकारने केली. परंतु ही मागणी राजकीय हेतूने प्रेरित असून मुशर्रफ यांच्यावर अशा कोणत्याही प्रकारचा गुन्हा दाखल नसताना त्यांच्याविरोधात रेड कॉर्नर नोटीस बजावणार नाही असे इंटरपोलने स्पष्ट केले आहे.