“PM Narendra Modi : “संकटं पाहून रडण्यापेक्षा आपण आता…”, पंतप्रधान मोदींची ट्रम्प यांच्या टॅरिफ धोरणावर सूचक प्रतिक्रिया

पंतप्रधान नरेंद्र मोदी यांनी ट्रम्प यांचं नाव न घेता त्यांना संदेश दिला आहे. ते म्हणाले, “आपल्याला (देशातील नागरिकांना) आपली पूर्ण ऊर्जा पणाला लावून आपली रेघ (रेषा) लांब करायची आहे. आपण आपली रेघ लांब केली तर जग आपल्याला सलाम करेल. जागतिक परिस्थिती पाहता सर्वजण स्वतःचा आर्थिक स्वार्थ पाहत असल्याचं दिसतंय. आपण कणखरपणे वैश्विक आर्थिक संकटांचा सामना करायला हवा. संकटं पाहून रडण्यापेक्षा हिंमतीने आपण आपली रेघ मोठी करुया आणि हीच काळाची गरज आहे. कोणाचाही स्वार्थ आपलं नुकसान करू शकणार नाही.”

पंतप्रधान मोदी यांचा नागरिकांना खास संदेश

भारताचे पंतप्रधान म्हणाले, “आता आपल्याला अनेक नव्या ताकदींचा सामना करावा लागणार आहे. अलीकडच्या काळात आपण अनेक बदल पाहिले आहेत. आपल्या देशाची ताकद वाढवण्यासाठी आपण स्वदेशीचा वापर वाढवूया. आपल्या देशात तयार होणाऱ्या वस्तू आपण खरेदी केल्या तर त्यातून भारत समृद्ध होईल. देशातील व्यापाऱ्यांनी देखील स्वदेशी वस्तू विकल्या पाहिजेत आणि विकत घेतल्या पाहिजेत. तसे फलकही आपल्या दुकानांबाहेर लावले पाहिजेत.”

“अलीकडच्या काळात विमा कंपन्यांमध्ये, विद्यापीठांमध्ये काही बदल करण्यात आले. ४० हजारांहून अधिक नियम रद्द करण्यात आले, १५०० हून अधिक जुने कायदे नष्ट करण्यात आले. डझनभर कायदे अधिक सुरळीत केले. काही कायद्यांमध्ये बदल केले आहेत.”

दाम कम, दम ज्यादा! काय आहे मोदी यांचा नागरिकांसाठीचा मंत्र?

दरम्यान, मोदी यांनी भारताने उच्च गुणवत्ता असलेल्या आणि परवडणाऱ्या उत्पादनांवर लक्ष केंद्रित केलं पाहिजे, असं मत व्यक्त केलं. यासाठी ‘दाम कम, दम ज्यादा’ हा मंत्र त्यांनी यावेळी सांगितला.