मित्रों… अबुधाबीमध्ये पंतप्रधान मोदी संबोधणार विक्रमी संख्येतील भारतीयांना

पंतप्रधान मोदींचं भाषण ऐकण्यासाठी इथं खूपच उत्सुकता आहे असं ओमानच्या सरकारी अधिकाऱ्यांनी म्हटलं आहे. जगभरातल्या भारतीयांशी संवाद साधण्यासाठी मोदी नेहमीच तत्पर असतात, आणि ते जगभरातल्या भारतीयांना देशाचे राष्ट्रदूत किंवा एकप्रकारे अँबॅसिडर असेच संबोधतात असे एका सरकारी अधिकाऱ्याने सांगितले.

अबू धाबीमध्ये पहिलं मंदीर बांधण्यात येणार असून या मंदिराच्या शिला – पूजन समारंभाची व्हिडीयो लिंकही मोदींना या दौऱ्यात बघायला मिळणार आहे. पश्चिम आशियातील हा दौरा मोदींसाठी या दृष्टीनेही महत्त्वाचा ठरणार आहे. सध्या आखाती देशांमध्ये केवळ दुबईमध्ये हिंदूंचे एकमेव मंदिर आहे.

मोदींनी 2015 मध्ये अमिरातीला भेट दिली होती, त्यावेळी हिंदूंच्या मंदिरासाठी जागा देण्याची घोषणा संयुक्त अरब अमिराती सरकारनं केली होती. त्यानुसार 20 हजार चौरस मीटरची जागा अल वथबा येथे देण्यात आली आहे. मंदिराच्या बांधकामाचा खर्च खासगी निधीतून करण्यात येणार आहे. संयुक्त अरब अमिरातीमध्ये 26 लाख भारतीय असून तिथल्या एकूण लोकसंख्येच्या 30 टक्के भारतीय आहेत.

फेब्रुवारी 10 रोजी मोदी अबुधाबीमध्ये येणार असून दुसऱ्या दिवशी ते दुबईला भेट देतील. दुबईमध्ये सहावे जागतिक सरकार संमेलन असून या कार्यक्रमाचे मोदी हे मुख्य आकर्षण असणार आहेत. याशिवाय भारत व संयुक्त अरब अमिराती यांच्यामध्ये आर्थिक व सुरक्षाविषयक सहकार्याला या भेटीमुळे आणखी चालना मिळण्याची चिन्हे आहेत.