पुतिन यांचा युक्रेनला नागरी युद्धाचा इशारा

युक्रेनच्या सरकारने रशियाच्या शस्त्रधारी गटांविरोधात कारवाईला सुरुवात केल्याने रशियाचे अध्यक्ष व्लादिमिर पुतिन यांनी युक्रेनला नागरी युद्धाचा इशारा दिला आहे. युक्रेन सरकारने रशियाच्या गटांविरोधात कारवाई करण्यासाठी पूर्व युक्रेनमध्ये सैन्य पाठविले आहे. रशियाच्या अध्यक्षांनी याचा तीव्र शब्दांत निषेध व्यक्त करून हा संघर्ष आता चिघळणार आहे, असे सांगितले. पुतिन आणि जर्मन चॅन्सलर अँजेला मर्केल यांनी चर्चा केल्यानंतर रशियाने नागरी युद्धाचा इशारा दिला, मात्र हा संघर्ष चिघळू नये याासाठी प्रयत्न करण्याबाबतही या दोन्ही नेत्यांमध्ये चर्चा झाल्याचे समजते. रशिया, युरोपियन युनियन, अमेरिका आणि युक्रेन यांच्या राजनैतिक अधिकाऱ्यांची याबाबत चर्चा होणार आहे.
रशियाच्या ६ लष्करी तुकडय़ा पूर्व युक्रेनमध्ये
रशियाचे अध्यक्ष व्लादिमिर पुतिन यांनी नागरी युद्धाचा इशारा दिल्यानंतर सहा लष्करी तुकडय़ा पूर्व युक्रेनमधील स्लाविन्सक शहरात घुसल्या आहेत. या लष्करी तुकडय़ांनी शस्त्रधारी गटांना पाठिंबा दिला आहे.