काँग्रेसचे वरिष्ठ नेते राधाकृष्ण विखे-पाटील हे भाजपामध्ये प्रवेश करणार असल्याची चर्चा होती. मात्र, या चर्चेला आता खुद्द त्यांच्या मुलानेच पूर्णविराम दिला आहे. विखे-पाटील हे काँग्रेसमध्ये राहणार असल्याचे सुजय विखे यांनी माध्यमांशी बोलताना स्पष्ट केले. वडील काँग्रेसमध्ये असताना मी भाजपामध्ये प्रवेश केलेला आहे. ही वैयक्तिक बाब आणि निवडणूक आहे. त्यामुळे राधाकृष्ण विखे-पाटील यांनी भाजपात प्रवेश करण्याचा प्रश्नच येत नाही, असे सुजय विखे यांनी म्हटले आहे. भाजपाचे उमेदवार सुजय विखे-पाटील यांच्या प्रचारासाठी पंतप्रधान नरेंद्र मोदी आज अहमदनगरमध्ये सभा घेणार आहेत. याची जय्यत तयारीही करण्यात आली आहे. याच सभेत राधाकृष्ण विखे-पाटील भाजपात प्रवेश करतील अशी चर्चा होती. मात्र, आता ही केवळ अफवाच ठरली आहे.
