भूलोकीचे नंदनवन ठरलेली राष्ट्रपती भवनातली मुघल गार्डन ही बाग सर्वसामान्य पर्यटकांसाठी खुली करण्यात आली आहे. ६ फ्रेबुवारी ते ९ मार्च या काळात सकाळी साडेनऊ वाजल्यापासून ते चारवाजेपर्यंत ही बाग सामान्य पर्यटकांसाठी खुली राहणार आहे. राष्ट्रपती भवनातील मुघल गार्डन म्हणजे मुघल साम्राज्याच्या ऐश्वर्यपूर्ण सौंदर्याचा नजराणा आहे. या बागेवर मुघल-ब्रिटिश सौंदर्याची छाप आहे. दरवर्षी फेब्रुवारी ते मार्च महिन्यात ही बाग सर्वसमान्यासाठी खुली करण्यात येते, याकाळात सर्वसमान्यांना या शाही बागेत फेरफटका मारण्याची संधी मिळते.
१३ एकरात पसरलेली ही बाग राष्ट्रपती भवनाच्या पिछाडीस आहे. देशातील अप्रतिम बगीच्यांमध्ये ही बाग आजही आपला नावलौकिक राखत अग्रेसर आहे. या बगीचाचा आराखडा प्रख्यात वास्तुविशारदाकडे सर एडविन लचिन्स यांनी तयार केला आहे. कलेचे कोणतेच तांत्रिक शिक्षण घेतलेले नसताना अंगभूत हुशारी आणि कल्पकतेने एडविन लचिन्सने इंग्लंडमध्ये अनेक अमीर, उमराव, सरदारांच्या इमारती बांधल्या होत्या. त्यामुळे राष्ट्रपती भवनाचा आराखडाही त्यांनीच तयार केला. या मुघल गार्डनची निर्मिती करून एडविन लचिन्सन यांनी आपली सौंदर्यदृष्टी दाखवली आहे.
रंगीबेरंगी ८ प्रजातींच्या ट्युलिप्सच्या बागा या राष्ट्रपती भवनातील प्रमुख आकर्षण आहे. येथे ट्युलिप्सची एकूण १० हजार रोपटी आहेत. ही ट्युलिप्स खास नेदरलँड्स वरून मागवण्यात आली. जानेवारीच्या पहिल्या आठवड्यात ट्युलिप्स फुलतात. ट्युलिप्स व्यतिरिक्त येथे अनेक रंगांच्या फुलांची उधळण पाहायला मिळते. बागेतील सहा कमळाकृती कारंजी तिच्या सौंदर्यात आणखी भर घालताहेत मुघल गार्डनच्या भोवती कार्यालयीन इमारती, कर्मचारी निवास व्यवस्था आहे. ब्रिटिश राज्यकर्त्यांच्या कलात्मक दृष्टीतून साकारलेली ही अनोखी बाग पाहणं हा पर्यटकांसाठी नेहमीच असीम आनंद असतो.
