टिपू जयंतीविरोधात कर्नाटकात रास्ता रोको

अठराव्या शतकातील म्हैसूरचा सत्ताधीश टिपू सुलतानची जयंती साजरी करण्याच्या कर्नाटक सरकारच्या निर्णयाचे तीव्र पडसाद कर्नाटकात उमटत आहेत. या निर्णयाविरोधात आंदोलन करताना विश्व हिंदू परिषदेचा (विहिंप) स्थानिक कार्यकर्ता ठार झाल्याने आंदोलन तीव्र झाले असून शुक्रवारी विंहिपच्या कार्यकर्त्यांनी राज्यभर रास्ता रोको आंदोलन केले.
कर्नाटकातील मंगळुरू, तुमकुरू, चित्रदुर्गा, शिवमोग्गा आणि हसन या भागांत विहिंप आणि बजरंग दलाच्या कार्यकत्रे रस्त्यावर उतरले. बंगळुरूमध्ये टाऊन हॉलसमोर आंदोलन करण्यात आले. आंदोलकांनी मुख्यमंत्री सिद्धरामय्या यांच्याविरोधात जोरदार घोषणाबाजी केली. मंगळुरूमध्ये बंदला उत्स्फूर्त प्रतिसाद मिळाला. कर्नाटक राज्य रस्ते वाहतूक महामंडळाच्या बसबरोबरच खासगी बस सेवा बंद ठेवण्यात आली होती.