मोदी सरकारकडून रिझर्व्ह बँकेच्या गव्हर्नरना घसघशीत पगारवाढ

गव्हर्नर उर्जित पटेल यांना एकूण २ लाख ९ हजार ५०० रुपये इतके वेतन मिळायचे. यामध्ये मूळ वेतनासह इतर भत्त्यांचा समावेश होता, अशी माहिती रिझर्व्ह बँकेच्या संकेतस्थळावर उपलब्ध आहे. मात्र आता यामध्ये वाढ करण्यात आली आहे. गव्हर्नरांच्या पगारात वाढ करण्यात आल्याची माहिती रिझर्व्ह बँकेने माहिती अधिकारांतर्गत दाखल करण्यात आलेल्या एका अर्जाला उत्तर देताना दिली आहे. गव्हर्नर आणि डेप्युटी गव्हर्नर यांना १ जानेवारी २०१६ पासून नवा पगार लागू करण्यात आला असल्याचे रिझर्व्ह बँकेने सांगितले आहे.

गव्हर्नर उर्जित पटेल आणि डेप्युटी गव्हर्नरना पगारवाढीनंतर नेमका किती पगार देण्यात येणार आहे, याची माहिती रिझर्व्ह बँक ऑफ इंडियाकडून देण्यात आलेली नाही. सप्टेंबर २०१६ मध्ये पटेल यांनी रिझर्व्ह बँकेची सूत्रे हाती घेतली. यानंतर ऑक्टोबर महिन्यात पटेल यांना २ लाख ९ हजार रुपये वेतन मिळाले होते. पटेल यांच्याआधी रिझर्व्ह बँकेची धुरा सांभाळणाऱ्या रघुराम राजन यांनादेखील ऑगस्ट महिन्यात २ लाख ९ हजार रुपये इतके वेतन देण्यात आले होते.

रघुराम राजन यांनी ५ सप्टेंबर २०१३ पासून रिझर्व्ह बँकेचे नेतृत्व करण्यास सुरुवात केली. त्यावेळी त्यांचे वेतन १ लाख ६९ हजार रुपये इतके होते. यानंतर मार्च २०१४ मध्ये रघुराम राजन यांचे वेतन १ लाख ७८ हजार रुपये इतके झाले, तर मार्च २०१५ मध्ये राजन यांचे वेतन १ लाख ८७ हजार रुपये इतके झाले. जानेवारी २०१६ मध्ये राजन यांचे वेतन २ लाख ४ हजारांवरुन २ लाख ९ हजार करण्यात आले होते.