Indore Bride Missing : इंदौर येथील राजा रघुवंशी आणि पत्नी सोनम या बेपत्ता जोडप्याच्या प्रकरणात पोलिसांनी सोनमचा मृतदेह शोधण्यासाठी जंग जंग पछाडलं आहे. राजा रघुवंशीचा मृतदेह खोल दरीत सापडला असला तरीही सोनमचा अद्याप कोणताही ठावठिकाणा लागलेला नाही. तिला शोधण्यासाठी देशातील सर्वांत आव्हानात्मक भूभाग असलेल्या मेघालयातील खोल दरीत तिचा शोध सुरू केला आहे. येथे बचाव पथकाला डाग असलेला एक काळा रेनकोटही सापडला आहे. इंडियन एक्स्प्रेसने यासंदर्भातील वृत्त दिलं आहे.
राष्ट्रीय आपत्ती प्रतिसाद दलाने (एनडीआरएफ) राजाचा मृतदेह सापडलेल्या ठिकाणाजवळील वेइसावॉन्ग व्ह्यूपॉइंटवर रॅपलिंग उपकरणे तैनात केली, कर्मचारी सुमारे २०० मीटर घाटात उतरले आणि नंतर दृश्यमानता कमी असल्याने आणि धोकादायकपणे निसरड्या परिस्थितीमुळे ऑपरेशन थांबवावे लागले.
“वेसावॉन्ग येथील ही तीव्र दरी एनडीआरएफसाठी खूप आव्हानात्मक आहे. त्याची दृश्यमानता कमी आहे आणि त्याचे वैशिष्ट्य म्हणजे त्याचा भूभाग. माती ओली आहे आणि दगड निसरडे आहेत. आम्ही २०० मीटर खाली उतरण्यात यशस्वी झालो आहोत, परंतु आम्ही अजूनही जमिनीवर पोहोचू शकत नाही”, असं एनडीआरएफच्या पहिल्या बटालियनचे निरीक्षक लालरिंगसन म्हणाले.
काश्मीरच्या शून्याखालील तापमानात आणि राजस्थानच्या तीव्र उष्णतेमध्ये ज्यांच्या पथकांनी काम केले आहे, ते अनुभवी बचाव अधिकारी लालरिंगसन म्हणाले की, “सोहराचा भूभाग भारतातील आणि परदेशातील इतर भूभागांपेक्षा खूप वेगळा आहे. या तीव्र दरीत जमिनीवर पोहोचण्यासाठी आम्ही रॅपलिंग उपकरणांचा वापर करून आमचे सर्वोत्तम प्रयत्न केले आहेत.”
लहरी हवामानेमुळे शोधमोहिमेत अडचणी
१७ सदस्यांची टीम गेल्या अनेक दिवसांपासून सोनमला शोधण्याचा प्रयत्न करत आहे, परंतु लहरी हवामानामुळे अडचणी निर्माण होत आहेत. दाट जंगलामुळे, कमी दृश्यमानता आणि ओले, निसरड्या खडकांमुळे जमिनीच्या पातळीपर्यंत पोहोचणे कठीण झाले आहे, तर सततच्या पावसामुळे ड्रोन प्रभावीपणे उडू शकत नाहीत.
या शोध मोहिमेत विविध एजन्सींचे ५०-६० कर्मचारी सहभागी आहेत, ज्यात स्पेशल ऑपरेशन्स टीम (एसओटी), एनडीआरएफ, स्टेट डिझास्टर रिस्पॉन्स फोर्स (एसडीआरएफ) आणि अग्निशमन आणि आपत्कालीन सेवा यांचा समावेश आहे. सोनमचा भाऊ गोविंद देखील घटनास्थळी होता.
रेनकोटवर रक्ताचे डाग
व्ह्यूपॉईंटजवळ एक काळा रेनकोट सापडला आहे. या रेनकोटवर काही डाग आहेत, परंतु ते रक्ताचे डाग आहेत की नाही हे अद्याप स्पष्ट झालेलं नाही. ते रक्ताचे डाग आहेत की नाही हे फक्त फॉरेन्सिकच सांगू शकतील”, असं पूर्व खासी हिल्सचे पोलिस अधीक्षक विवेक सायम म्हणाले.
दरम्यान, या जोडप्याचे नवीन सीसीटीव्ही फुटेज समोर आले आहे. यामध्ये ते २२ मे रोजी त्यांच्या हॉटेलमधून बाहेर पडत असल्याचे दिसून आले आहे. हे जोडपे शिलाँगमध्ये एकत्र चेक इन करताना देखील दिसले. व्हिडिओमध्ये, सोनम पतीशी रजिस्ट्री बुक समोर ठेवून संवाद साधताना दिसत आहे. तपासात या जोडप्याच्या शेवटच्या हालचाली स्पष्ट झाल्या आहेत. २२ मे रोजी राजा आणि सोनम भाड्याने घेतलेल्या स्कूटरवरून मावलाखियात गावात पोहोचले आणि स्थानिक मार्गदर्शक भा वानसाई यांनी त्यांना नोंगरियात गावातील शिपारा होमस्टे येथे नेले. तिथेच त्यांनी रात्र काढली. दुसऱ्या दिवशी सकाळी मावलाखियात सोडल्यानंतर त्यांचा ठावठिकाणा सापडला नाही. २ जून रोजी सकाळी ११.४८ वाजता वेई सावडोंग धबधब्याखालील दरीत राजाचा मृतदेह पोलिस ड्रोनने पाहिला.
