वाद वाढू नये यासाठीच राजीनामा दिला : गांगुली

‘माझ्यावर करण्यात आलेले आरोप निर्थक आणि चुकीचे आहेत,’ असा पुनरुच्चार करत सर्वोच्च न्यायालयाचे माजी न्यायाधीश अशोक गांगुली यांनी आणखी वाद वाढू नयेत यासाठीच पश्चिम बंगालच्या मानवी हक्क आयोगाच्या अध्यक्षपदाचा राजीनामा दिला असल्याचे मंगळवारी सांगितले.
एका प्रशिक्षणार्थी महिला वकिलाचे लैंगिक शोषण केल्याचा आरोप झाल्यानंतर न्या. गांगुली यांच्यावर राजीनामा देण्यासाठी दबाव वाढत होता. गेल्याच आठवडय़ात केंद्रीय मंत्रिमंडळाने गांगुली यांच्या राजीनाम्यासाठी राष्ट्रपतींकडे शिफारस करणार असल्याचा निर्णय घेतला होता. त्यानंतर अखेर सोमवारी संध्याकाळी गांगुली यांनी पश्चिम बंगालचे राज्यपाल एम. के. नारायणन यांची भेट घेऊन पदाचा राजीनामा दिला. त्यांनी राज्यपालांकडे सोपवलेल्या राजीनामापत्राची प्रत मंगळवारी ‘पीटीआय’ला वाचून दाखवली.
‘‘माझ्यावर करण्यात आलेल्या आरोपांबाबत कोणतेही पुरावे मिळालेले नाहीत. प्रसारमाध्यमांचा वापर करून हे आरोप मोठे करण्यात आले. मात्र हे आरोप निराधार आणि तथ्यहीन आहेत. मला हटवण्यासाठी या आरोपांचा आधार घेऊन केंद्र सरकार राष्ट्रपतींकडे शिफारस करणार होते. मात्र ते असमर्थनीय आणि अयोग्य आहे,’’ असे गांगुली यांनी सांगितले. गेल्या अनेक दिवसांपासून माझ्या कुटुंबात तणावाचे वातावरण होते. कुटुंबात शांततेचे आणि आनंददायी वातावरण निर्माण होण्यासाठी आणि अजून वाद वाढू नये यासाठीच राजीनामा दिला आहे, असे गांगुली म्हणाले. ‘‘मला कोणत्याही पदाची अभिलाषा नाही. मात्र मी माझे काम सन्मानाने करू इच्छितो. त्यामुळे माझ्यावर झालेल्या आरोपांमुळे मी दुखावलो गेलो,’’ असे गांगुली यांनी सांगितले.
दरम्यान, गांगुली यांचा राजीनामा राज्यपाल एम. के. नारायणन यांनी स्वीकारला आहे. पश्चिम बंगालच्या राजभवनातील प्रवक्त्याने ही माहिती दिली. राजीनामा स्वीकारून राज्यपालांनी पश्चिम बंगाल सरकारला याबाबत माहिती दिली आहे.