राष्ट्रपती रामनाथ कोविंद यांनी राज्यसभेवर चार प्रसिद्ध व्यक्तींची खासदार म्हणून नियुक्ती केली आहे. शेतकरी नेते राम शकल, लेखक राकेश सिन्हा, शिल्पकार रघुनाथ महापात्रा आणि क्लासिकल डान्सर सोनल मानसिंह या चौघांना राष्ट्रपतींनी राज्यसभेत खासदार म्हणून नियुक्त केले आहे. सिनेसृष्टी आणि खेळ जगतातून एकाही प्रसिद्ध चेहेऱ्याला संधी मिळालेली नाही ही बाब महत्त्वाची आहे. कारण अभिनेत्री रेखा आणि मास्टरब्लास्टर सचिन तेंडुलकर यांच्या राज्यसभेतील गैरहजेरीवरून बरीच टीका आणि चर्चा झाली होती. त्यामुळे सिनेसृष्टी आणि खेळ जगतातून कोणाचीही निवड करण्यात आलेली नाही असे समजते आहे.

राष्ट्रपती रामनाथ कोविंद यांनी निवड केलेले चारही लोक हे आपल्या क्षेत्रातील दिग्गज आहेत. २०१९ च्या निवडणुकांच्या पार्श्वभूमीवर या चौघांची नियुक्ती अत्यंत महत्त्वाचे पाऊल मानले जाते आहे. राम शकल हे उत्तर प्रदेशचे आहेत. त्यांनी समाजातील दलित आणि मागासवर्गीय घटकांसाठी महत्त्वाचे कार्य केले आहे. राकेश सिन्हा हे संघ विचारांचे आहेत, भाजपाची विचारसरणी काय आहे हे ते विविध कार्यक्रमांमध्ये मांडत असतात. तसेच दिल्ली विद्यापीठाच्या महाविद्यालयात ते प्राध्यापक म्हणूनही काम करतात. सोनल मानसिंग या क्लासिकल डान्सर म्हणून देशभरात प्रसिद्ध आहेत. रघुनाथ महापात्रा हे ओदिशाचे आहेत, जगन्नाथ मंदिरासंबंधी त्यांनी महत्त्वाचे कार्य केले आहे.

नियुक्त करण्यात आलेल्या खासदारांचा परिचय

राम शकल (समाजसेवा) राज्य- उत्तरप्रदेश शिक्षण- गोरखपूर विद्यापीठातून MA

दलित आणि मागासवर्गीय समाजाच्या प्रगतीसाठी महत्त्वाचे कार्य केले आहे
शेतकरी, मजूर वर्ग आणि प्रवासी यांच्या हितासाठी ते कार्यरत आहेत
गेल्या चाळीस वर्षांपासून ते समाजसेवेत कार्यरत आहेत

राकेश सिन्हा  (राज्य-बिहार शिक्षण- कोटा विद्यापीठातून PHD, दिल्ली विद्यापीठातून एम फिल)

राकेश सिन्हा हे सुप्रसिद्ध लेखक आहेत, दिल्ली विद्यापीठाच्या एका महाविद्यालयात प्राध्यापक आहेत
इंडियन काऊन्सिल ऑफ सोशल सायन्स रिसर्च बोर्डचे सदस्य
आत्तापर्यंत अनेक पुस्तके लिहिली आहेत, त्यात हेडगेवार यांच्या आयुष्यावर आधारित पुस्तकाचाही समावेश
केंद्रीय हिंदी संस्थानतर्फे दीनदयाळ उपाध्याय अवॉर्डही त्यांना मिळाले आहे

रघुनाथ महापात्रा ( शिल्पकार  राज्य-ओदिशा)

दगडाला आकार देऊन त्यातून शिल्प घडवण्याची कला अवगत असल्याने महापात्रा यांना शिल्प गुरु म्हटले जाते
प्राचीन मूर्ती, स्मारके यांच्या संरक्षणासाठी महत्त्वाचे कार्य
पुरी येथील जगन्नाथ मंदिराचे सौंदर्य अबाधित रहावे यासाठी केलेल्या कार्यात सिंहाचा वाटा
ओदिशा ललित कला अकादमीचे अध्यक्ष
पद्म विभूषण, पद्म भूषण आणि पद्मश्री या तिन्ही पुरस्कारांचे मानकरी
१९६४ मध्ये म्हणजेच वयाच्या २२ व्या वर्षी शिल्पकलेतला राष्ट्रीय पुरस्कार

सोनल मानसिंह- क्लासिकल डान्सर (राज्य-महाराष्ट्र आणि दिल्ली शिक्षण- डिलिट, डिएसी, बीए ऑनर्स )

भारतातील प्रमुख शास्त्रीय नृत्यांगनांपैकी एक
६ दशकांपासून भरतनाट्यम आणि ओडिसी नृत्य सादर करतात
कोरियोग्राफर, शिक्षक, वक्त्या आणि सामाजिक कार्यकर्त्या म्हणूनही ओळख
पद्मविभूषण आणि पद्म भूषण या दोन्ही पुरस्काराने सन्मान