“झोप येत नव्हती म्हणून सीटवरून उठला अन् त्याचवेळी…”, सौदी बस अपघातातून बचावलेल्या प्रवाशाने काय सांगितलं?

हिंदुस्तान टाइम्सने दिलेल्या वृत्तानुसार, या अपघातात २४ वर्षीय मोहम्मद अब्दुल शोएब बचावले आहेत. बस रस्त्याकडेला उभी होती तेव्हा बसमधील सर्व प्रवासी झोपले होते. शोएबही झोपण्याचा प्रयत्न करत होते. मात्र, त्यांना झोप लागत नव्हती म्हणून ते वेळ घालवण्यासाठी चालकाच्या शेजारी जाऊन बसले आणि गप्पा मारू लागले. त्याचवेळी डिझेलचा टँकर बसला धडकला. क्षणार्धात शोएब व बसच्या चालकाने बसमधून बाहेर उडी मारली.

बसमधील प्रवासी जागे होऊन बाहेर पडण्याआधीच मोठा स्फोट होऊन बसने पेट घेतला होता. त्यामुळे कोणालाही बसमधून बाहेर पडता आलं नाही. अपघातात चालक गंभीर जखमी झाला आहे. तर शोएब यांना किरकोळ दुखापत झाली आहे. भारतीय वेळेनुसार रविवारी मध्यरात्री १.३० वाजता हा अपघात झाला. त्यानंतर शोएब यांना रुग्णालयात नेण्यात आलं. शोएब यांनी सकाळी ५.३० वाजता त्यांचे नातेवाईक तहसीन यांना फोन केला आणि ते सुखरूप असल्याचं सांगितलं. बसमधून उडी मारल्यामुळे त्यांना किरकोळ दुखापत झाली होती. त्यांच्यावर मदिनामधील जर्मन रुग्णालयात उपचार करण्यात आले.

(बातमी अपडेट होत आहे.)