MEA : गाझामध्ये झालेल्या पत्रकारांच्या हत्येचा भारताने नोंदवला निषेध, “अत्यंत धक्कादायक आणि निषेधार्ह..”

नेमकी घटना काय घडली?

‘असोसिएटेड प्रेस’च्या मुक्त पत्रकार मॅरियम डाग्गा (वय ३३) यांचा हल्ल्यात मृत्यू झाला. ‘अल जझीरा’च्या महंमद सलाम यांचाही मृत्यूही झाला. ‘रॉयटर्स’चा कॅमेरामन हुसाम अल मास्री यांचा रुग्णालयातून थेट प्रक्षेपण करताना मृत्यू झाला. विविध वृत्तसंस्थांसाठी काम करणारे मुक्त पत्रकार मोआझ अबू ताहा, अहमद अबू अझीझ या अन्य दोन पत्रकारांचा मृतांमध्ये समावेश आहे, तर छायाचित्रकार हतीम खालेद जखमी झाले. रुग्णालयातील अधिकाऱ्यांनी ही माहिती दिली. डाग्गा यांच्या मृत्यूनंतर ‘एपी’ने डाग्गा यांच्यासह इतर पत्रकारांचा झालेला मृत्यू धक्कादायक असल्याचे निवेदन प्रसिद्ध केले. नासेर रुग्णालयावरील इस्रायलच्या हल्ल्यात एकूण १९ जणांचा मृत्यू झाला. आरोग्य मंत्रालयाचे प्रमुख झहर अल वाहिदी यांनी ही माहिती दिली. डाग्गा यांना १२ वर्षांचा मुलगा आहे.

रणधीर जैस्वाल काय म्हणाले?

गाझामध्ये घडलेली पत्रकारांच्या हत्येची घटना ही अत्यंत धक्कादायक आणि तेवढीच निषेधार्ह आहे. इस्रायल आणि गाझा यांच्या संघर्षात सामान्य माणसांचा बळी जाणं योग्य नाही. आम्हाला हे ठाऊक आहे की इस्रायलने या संदर्भातल्या चौकशीचे आदेश तातडीने दिले आहेत. मात्र अशा गोष्टी धक्कादायक आणि तेवढ्याच निषेधार्ह आहेत असंही त्यांनी म्हटलं आहे.

इस्रायलकडून चौकशीचे आदेश

इस्रायलच्या लष्कराने, संरक्षण दलांनी या हल्ल्याची कबुली दिली असून, चौकशीचे आदेश दिले आहेत. पत्रकारांच्या आणि निरपराध नागरिकांच्या मृत्यूबद्दल इस्रायलच्या संरक्षण दलांनी दिलगिरी व्यक्त केली आहे. इस्रायल-हमासच्या संघर्षात आतापर्यंत २४० हून अधिक पत्रकारांचा मृत्यू झाला आहे. या तुलनेत रशिया-युक्रेन युद्धात आतापर्यंत १८ पत्रकारांचा मृत्यू झाला आहे. दोन आठवड्यांपूर्वी इस्रायलच्या हल्ल्यात अल जझीराच्या अनास शरीफ यांचा मृत्यू झाला होता.

युद्धाचे वार्तांकन करण्यापासून आंतरराष्ट्रीय माध्यमांना इस्रायलने रोखले आहे. त्यामुळे गाझामध्ये नक्की काय होत आहे, याची माहिती जगाला व्हावी, यासाठी आंतरराष्ट्रीय वृत्तसंस्था पॅलेस्टाइनमधील स्थानिक पत्रकार आणि नागरिक यांच्या हवाल्यावर मोठ्या प्रमाणावर अवलंबून आहेत. इस्रायलने पॅलेस्टाइनच्या पत्रकारांच्या विश्वासार्हतेवर कायमच शंका उपस्थित केल्या आहेत. गाझामध्ये काम करणाऱ्या अनेक पत्रकारांनाही त्यांच्यासह त्यांच्या कुटुंबीयांसाठी अन्न मिळविण्यासाठी झगडावे लागत आहे.