श्रीलंका बॉम्बस्फोट प्रकरणी केरळातून दोन जणांना ताब्यात

टाईम्स नाऊच्या वृत्तानुसार, केरळातील कासरगोड जिल्ह्यातून राष्ट्रीय सुरक्षा पथकाने रविवारी दोघांना ताब्यात घेतलं आहे. कासरगोडमधून अनेक तरूण अफगाणिस्थानमध्ये दहशतवादी संघटनेत सहभागी झाल्याची चर्चा यापूर्वी झाली होती. ताब्यात घेण्यात आलेल्या दोघांचा संबंध श्रीलंका बॉम्बस्फोटातील सुत्रधार जहरान हाशीम याच्याशी असल्याचे वृत्त आहे. या दोघांची सध्या एआयएच्या मुख्यालयात चौकशी सुरू आहे.

राष्ट्रीय सुरक्षा पथकाने (एनआयए) रविवारी केरळमध्ये तीन ठिकाणी छापेमारी केली. २०१६ मधील आयसीसी कसारगोड मॉड्युल प्रकरणासाठी एनआयएनं छापेमारी केली होती. ताब्यात घेण्यात आलेले दोघे आयसीसच्या संपर्कात असल्याचा संशय तपास यंत्रणाला आधीपासूनच आहे.

दरम्यान, रॉयटर्सच्या वृत्तानुसार, श्रीलंकेत शुक्रवारी झालेल्या चकमकीत १५ दहशतवाद्यांचा खात्मा करण्यात आला होता. यामध्ये बॉम्बस्फोटातील सुत्रधाराच्या वडिल आणि दोन भावांचाही मृत्यू झाला आहे. रॉयटर्सने पोलिसांच्या हवाल्यानं दिलेल्या वृत्तानुसार, शुक्रवारी झालेल्या चकमकीत जेनी हाशीम, रिलवान हाशीम आणि सुत्रधाराचे वडिल मोहम्मद हाशीम यांना शुक्रवारी पूर्व भागात झालेल्या चकमकीत मारले. या तिघांचा काही दिवसांपूर्वी सोशल मीडियावर एक व्हिडीओ व्हायरल झाला होता. यामध्ये येथिल स्थानिकांविरोधात बोलत असल्याचे दिसत होते. दहशतवाद्यांना प्रेरणा देत असल्याचेही यामध्ये दिसत होते.

श्रीलंकेच्या लष्कराचे प्रवक्ते सुमित अटापटू यांनी शनिवारी सांगितले की, सुरक्षा रक्षकांनी जेव्हा कलमुनई शहरात बंदुकधाऱ्यांच्या ठिकाण्यांवर घुसण्याचा प्रयत्न केला. त्यावेळी तिथे लपलेल्या दहशतवाद्यांनी गोळीबार सुरु केला, त्यानंतर सुरक्षा रक्षकांनी त्यांना प्रत्युत्तर दिले.

गेल्या रविवारी श्रीलंकेची राजधानी कोलंबोमध्ये तीन चर्च व तीन हॉटेलमध्ये ईस्टर संडेला झालेल्या बाँबस्फोटांमध्ये ३५९ जणांनी प्राण गमावले तर ५०० च्या वर नागरिक जखमी झाले. दहशतवादी सुशिक्षित होते, चांगल्या आर्थिक स्थितीतील होते व त्यांचे आंतरराष्ट्रीय पातळीवर संबंध होते असे श्रीलंकेच्या अधिकाऱ्यांनी बुधवारी सांगितले. या बाँबस्फोटांची जबाबदारी इस्लामिक स्टेटनं घेतली.