ब्रिटनच्या दौऱ्यात सईदने मुस्लिमांना जिहादसाठी चिथावणी दिल्याचे स्पष्ट

पाकिस्तानमधील लष्कर ए तोयबा या संघटनेचा म्होरक्या हाफिज सईद याने १९९५ मध्ये ब्रिटनमधील दौऱ्यात तेथील मुस्लिमांना जिहादी होण्यासाठी चिथावणी दिली होती, असे प्रसारमाध्यमातील वृत्तात म्हटले आहे.

बीबीसीने याबाबत दिलेल्या वृत्तानुसार जमात उद दवाचा प्रमुख असलेल्या सईद याने १९९५ मध्ये ब्रिटनमधील मशिदींना भेटी दिल्याचे लष्क र ए तोयबाच्या नियतकालिकातील छायाचित्रांवरून दिसून आले आहे. या दौऱ्यात त्याने बर्मिगहॅम येथे बोलताना हिंदूंचा निषेध करून मुस्लिमांना जिहादसाठी संघटित होण्याचे आवाहन केले होते. त्यावेळी लिसेस्टरशायर येथे त्याने घेतलेल्या मेळाव्यात ४००० युवक उपस्थित होते. बीबीसी रेडिओ ४ च्या द डॉन ऑफ ब्रिटिश जिहाद या लघुपटात ही माहिती देण्यात आली. हा लघुपट काल दाखवण्यात आला. कार्यक्रमाच्या निर्मात्यांपैकी एक असलेले सादिक इक्बाल यांनी सांगितले की, तेथील प्रत्येक कार्यक्रमात सईद जिहादविषयी बोलताना दिसत आहे. ग्लासगो येथे सईद याने एका मशिदीत सभा घेतली त्यात त्याने यहुदी लोक अब्जावधी डॉलर्स जिहादविरोधात वापरत असल्याचे म्हटले होते. मुस्लिमांना आर्थिकदृष्टय़ा नेस्तनाबूत करण्याचाही त्यांचा इरादा आहे असा आरोपही त्याने केल्याचे दिसून येते. ग्लासगो मशिदीने सईदसारख्या दहशतावाद्याला खुले आम प्रवेश दिल्याची गोष्टच धक्कादायक आहे कारण ती मशीद देवबंदची होती. १९९५ मध्ये सईद हा काश्मीरमधील सक्रिय दहशतवादी होता. ग्लासगो मशिदीने यावर प्रतिक्रिया दिलेली नाही. लष्कर ए तोयबा या संघटनेचा प्रचार त्याने या दौऱ्यात के ला होता. मार्च २००१ मध्ये ब्रिटनच्या गृह मंत्रालयाने सईदला जागतिक दहशतवादी घोषित केले होते. २६ नोव्हेंबर २००८ रोजी मुंबईत करण्यात आलेल्या दहशतवादी हल्ल्यात सईद हा सूत्रधार होता.