WhatsApp Down : मेटाचे सोशल मेसेजिंग अॅप असलेल्या व्हॉट्सअॅपची सेवा डाऊन झाल्याची माहिती समोर आली आहे. व्हॉट्सअॅपच्या सेवांमध्ये व्यत्यय येत असून हजारो व्हॉट्सअॅप वापरकर्त्यांना मेसेज पाठवण्यास आणि स्टेटस अपलोड करण्यासाठी अडचणी येत असल्याची माहिती सांगण्यात येत आहे. अनेक व्हॉट्सअॅप वापरकर्त्यांनी गुरुवारी रात्री उशिरा व्हॉट्सअॅप डाउन झाल्याची तक्रार सोशल मीडिया प्लॅटफॉर्म असलेल्या एक्सवर (ट्विटर) केली आहे.
तसेच व्हॉट्सअॅप अॅप्लिकेशन आणि वेब व्हॉट्सअॅपलाही अडचणी निर्माण झाल्याचं सांगितलं जात आहे. त्यामुळे हजारो व्हॉट्सअॅप वापरकर्त्यांना अडचणीचा सामना करावा लागत आहे. भारतासह जगभरातील अनेक व्हॉट्सअॅप वापरकर्त्यांना या अडचणी येत आहेत. ऑनलाईन सेवांच्या स्थितीवर लक्ष ठेवणारी वेबसाइट डाउनडिटेक्टरने वापरकर्त्यांच्या तक्रारींमध्ये लक्षणीय वाढ नोंदवली आहे.
दरम्यान, व्हॉट्सअॅपची सेवा डाऊन झाल्याबाबत गुरूवारी रात्री ११:१६ पर्यंत व्हाट्सअॅपविरुद्ध किमान १,१८६ तक्रारी नोंदवण्यात आल्या आहेत. १,१८६ तक्रारी नोंदवत त्यांना व्हॉट्सअॅप चालवण्यात अडचणी येत असल्याचं त्यांनी सांगितलं आहे. तसेच अधिकाधिक लोकांनी प्लॅटफॉर्मवर समस्यांची तक्रार केल्यामुळे #Whatsappdown पुन्हा एकदा एक्सवर ट्रेंडिंग होऊ लागलं आहे. या संदर्भातील वृत्त न्यूज १८ ने दिलं आहे.
व्हॉट्सअॅपकडून अद्याप अधिकृत प्रतिक्रिया नाही
दरम्यान, व्हॉट्सअॅपची मूळ कंपनी मेटाने अद्याप याबाबत कोणतंही निवेदन जारी केलेलं नाही. त्यामुळे व्हॉट्सअॅप वापरकर्त्यांना अशा प्रकारच्या अडचणी का येत आहेत? याचं कारण मेटाने स्पष्टीकरण दिल्यानंतरच समोर येणार आहे.
सोशल मीडियावर मीम्स व्हायरल
व्हॉट्सअॅपची सेवा डाऊन झाल्याची माहिती समोर आल्यानंतर अनेकांना मेसेज पाठवण्यास, स्टेटस अपलोड करण्यास अडचणी आल्यानंतर अनेकांनी ट्विटरसह वेगवेगळ्या सोशल मीडियावर प्रतिक्रिया व्यक्त केल्या आहेत. यावरून सोशल मीडियावर मीम्सचा भडिमार सुरू झाला आहे. व्हॉट्सअॅप बंद आहे का? स्टेटस अपलोड करण्यास अडचणी येत आहेत का?, अशा पोस्ट अनेकांनी केल्या आहेत.
