Bihar BJP MLA Maithili Thakur : कोण आहेत बिहारमधील सर्वात तरुण आमदार मैथिली ठाकूर?

दरम्यान, बिहारच्या निवडणुकीत सर्वाधिक चर्चा झाली ती म्हणजे लोकप्रिय गायिका मैथिली ठाकूर यांची. मैथिली ठाकूर यांनी या निवडणुकीत मोठा विजय मिळवला आहे. भाजपाला जो मतदारसंघ यापूर्वी कधीच जिंकता आला नव्हता त्या मतदारसंघात मैथिली यांनी भाजपाचं कमळ फुलवलं आहे. त्यांच्यामुळे बिहार विधानसभा निवडणुकीच्या माध्यमातून भाजपाला पहिल्या जेन-झी (Gen Z) आमदार मिळाल्या आहेत. त्या बिहारमधील अलीनगर मतदारसंघातून निवडणुकीला उभ्या राहिल्या होत्या. मैथिली ठाकूर यांनी राष्ट्रीय जनता दलाचे उमेदवार बिनोद मिश्रा यांचा ११,७३० मतांनी पराभव केला आहे. मैथिली यांना ८४,९९५ मतं मिळाली आहेत. तर, मिश्रा यांना ७३,१८५ मतं मिळाली आहेत.

कोण आहेत मैथिली ठाकूर?

मैथिली ठाकूर या मूळच्या मधुबनी येथील रहिवासी आहे. तिथेच २५ जुलै २००० रोजी त्यांचा जन्म झाला. त्यानंतर त्यांचं कुटुंब नजफगडला स्थायिक झालं. मैथिली यांच्या बालपणी ठाकूर कुटुंबाची आर्थिक परिस्थिती बेताची होती. त्याचदरम्यान त्यांनी संगीत शिक्षणाकडे कल वळवला. त्यांच्या वडिलांनी त्यांना खूप प्रोत्साहन दिलं. संगीतातले त्यांचे पहिले गुरू त्यांचे वडील म्हणजेच रमेश ठाकूर हे आहेत. रमेश ठाकूर यांनी मैधिली यांना हिंदुस्तानी शास्त्रीय आणि लोकसंगीतावर प्रभुत्व मिळवण्यास मदत केली.

मैथिली यांनी वयाच्या चौथ्या वर्षापासून गायन शिकण्यास सुरुवात केली. त्यांचे वडील रमेश ठाकूर हे संगीत शिक्षक असून ते वेगवेगळ्या धार्मिक कार्यक्रमांमध्ये भजन गातात. मैथिलीच्या मातोश्री भारती या गृहिणी आहेत. त्यांचे मोठे बंधू ऋषभ ठाकूर हे तबला वादक आहेत, तर धाकटे बंधू अयाची ठाकूर हे देखील गायक आहेत. मैथिली ठाकूर अवघ्या २५ वर्षांच्या आहेत. ‘दी रायझिंग स्टार’ या शोमधून त्यांना राष्ट्रीय स्तरावर ओळख मिळाली. यूट्यूब चॅनेलवरील त्यांची भजनं आणि लोकगीतांद्वारे त्यांना प्रचंड लोकप्रियता मिळाली. त्या हिंदी, मैथिली, भोजपुरी आणि बंगालीसह अनेक भारतीय भाषांमध्ये गाणी गातात.