“लोक मला मुख्यमंत्री म्हणून…”, दिया कुमारींचं वक्तव्य, राजस्थानच्या मुख्यमंत्रिपदाच्या शर्यतीत तीन नेते आघाडीवर

भारतीय जनता पार्टीच्या विद्यमान खासदार दिया कुमारी यांनी यावेळी राजस्थान विधानसभा निवडणूक लढवली. जयपूरमधल्या विद्याधर नगर विधानसभा मतदारसंघात त्यांचा मोठ्या मतफरकाने विजय झाला आहे. वसुंधरा राजे आणि बालक नाथ यांच्यासह दिया कुमारी यांचं नाव मुख्यमंत्रिपदाच्या शर्यतीत आहे. मुख्यमंत्रिपदाबद्दल विचारल्यावर दिया कुमारी म्हणाल्या, “पक्ष नेतृत्व याबाबतचा निर्णय घेईल.” त्या इंडिया टुडेशी बोलत होत्या.

दिया कुमारी म्हणाल्या, “लोकांचं प्रेम आहे की ते मला मुख्यमंत्री म्हणून पाहू इच्छितात. परंतु, मुख्यमंत्री कोण होणार याबाबतचा निर्णय पूर्णपणे पक्षाचं संसदीय मंडळ घेईल. तसेच भारतीय जनता पार्टी आगामी लोकसभा निवडणुकीत उत्तम कामगिरी करेल. भाजपा तीन राज्यांमध्ये जिंकत आहे आणि याचा आम्हाला खूप आनंद आहे. जनतेने भ्रष्ट काँग्रेस सरकारला नाकारलं आहे आणि भाजपाला मतदान केलं आहे.”

हे ही वाचा >> “मर्द कोण हे कळलं का?” भाजपाचा उद्धव ठाकरेंना प्रश्न; राहुल गांधींवर टीका करत म्हणाले, “पनवती…”

आगामी लोकसभा निवडणुकीबाबत दिया कुमारी म्हणाल्या, आम्ही लोकसभेबाबत आता खूप सकारात्मक आहोत. भाजपा पूर्वीपेक्षा जास्त जागा जिंकेल. जयपूरमधील विद्याधर नगर मतदारसंघात दिया कुमारी ७१,३६८ मतांनी विजयी झाल्या आहेत. त्यांना एकूण १,५८,५१६ मतं मिळाली आहेत. या मतदारसंघात दिया कुमारी यांनी काँग्रेसच्या सीताराम अग्रवाल (८७,१४८) यांना पराभूत केलं आहे. निवडणुकीतील विजयानंतर दिया कुमारी यांनी जयपूरच्या गोविंद देवजी मंदिरात जाऊन प्रार्थना केली आणि त्यानंतर त्यांनी निवडणुकीतील विजयाबाबत प्रसारमाध्यमांशी बातचीत केली.