‘शेतकरी बझार’ आता मंत्रालयाच्या दारात

शेती मालाच्या थेट खरेदी-विक्रीसाठी तयार करण्यात आलेला ‘शेतकरी बझार’ आता मुंबईमध्ये थेट मंत्रालयाच्या दारामध्ये येत्या १५ ऑगस्ट रोजी मुख्यमंत्र्यांच्या हस्ते सुरु होणार आहे. राज्य शासन, कृषी मंत्रालय, पणन विभाग यांनी या उपक्रमासाठी पुढाकार घेतला असून स्वाभिमानी शेतकरी संघटनेसह, शेतकरी कंपन्या, शेतकरी गट यांनी भाजीपाला, फळं, धान्य पुरविण्याची तयारी दर्शविली आहे.

शेतकऱ्यांनी उत्पादित केलेला माल त्याला अनेकदा तोटय़ात विकावा लागतो, तर ग्राहकांना तो जादा दराने विकत घ्यावा लागतो. शेतकरी आणि ग्राहकांमधील साखळीमुळे हे दोन्ही घटक या व्यवस्थेत वेठीस धरले जात आहेत. याला छेद देण्यासाठीच ‘शेतकरी बझार’ ही कल्पना शासनाच्या वतीने तयार करण्यात आली आहे.

राज्यात सत्ता बदल झाल्यानंतर मुख्यमंत्री देवेंद्र फडणवीस यांनी शेतकऱ्यांनी उत्पादित केलेला माल थेट ग्राहकांपर्यत विकला जावा अशी नवी व्यवस्था सुरु होण्यासाठी पुढाकार घेतला. त्यातून ‘शेतकरी बझार’ची संकल्पना तयार झाली आहे. तसेच बाजार समितीत शेतकऱ्यांकडून होणारी अडत रद्द करण्याचा निर्णय आणि त्याच्या अंमलबजावणीसाठी पावले टाकण्यास सुरवात केली.

मुंबईतील हा ‘शेतकरी बझार’ येत्या १५ ऑगस्ट रोजी सुरू होणार आहे. नरिमन पॉईंट सारख्या प्रतिष्ठितांच्या भागात ‘शेतकरी बझार’चे रोपण झाल्यानंतर हळूहळू मुंबईभर विस्तार केला जाणार आहे. यायोगे शेतीमालाला चांगला दर मिळणार असून मुंबईकरांनाही कमी दरात ताजा माल मिळण्याची आशा निर्माण झाली आहे. पणन विभागाने शेतकऱ्यांना या ‘शेतकरी बझार’पर्यंत येण्यासाठी प्रवृत्त केले जात आहे.

शेतकऱ्यांसाठी खरा स्वातंत्र्यदिन

शेतकरी पिकवायला शिकला पण विकायला शिकला नाही. त्याने विकायलाही शिकावे यासाठी मुख्यमंत्री फडणवीस यांनी पुढाकार घेतला आहे. त्याचा प्रारंभ स्वातंत्र्यदिनाच्या पूर्वसंध्येला मंत्रालयाच्या बांधावर शासनाच्यावतीने होत आहे. शेतकऱ्यांना खऱ्या अर्थाने स्वातंत्र्यदिनाचा आनंद मिळणार आहे, असे मत कृषी व पणन राज्यमंत्री सदाभाऊ खोत यांनी व्यक्त केले.