मराठी भाषकांना बेळगावमध्ये अटक

बेळगावमध्ये १ नोव्हेंबर रोजी काळादिन आंदोलनात सहभागी झालेल्या वीसहून अधिक मराठी भाषक तरुणांना कर्नाटक पोलिसांनी अटक केली. त्यांच्यावरील कायदेशीर कारवाईबाबतची प्रक्रिया शुक्रवारी रात्री उशिरापर्यंत सुरू होती. मराठीद्वेषाचे दर्शन घडवीत आज कर्नाटक पोलिसांनी मराठी भाषकांना शोधून बेदम मारहाण केली. या प्रकाराबद्दल तरुणांचे पालक, महाराष्ट्र एकीकरण समिती व शिवसेनेच्या कार्यकर्त्यांनी बेळगाव जिल्हाधिकाऱ्यांकडे तक्रार केली. तर कर्नाटक पोलिसांनी केलेल्या अमानुष मारहाणीच्या प्रकाराविरुद्ध मानवाधिकार समितीकडे तक्रार करण्यात येणार आहे.

१ नोव्हेंबर हा कर्नाटक शासनाचा राज्योत्सव असतो. याच दिवशी सीमाभागातील मराठी भाषक गेली ६० वष्रे काळादिन पाळत आहेत. यंदाही १ नोव्हेंबर रोजी काळी वस्त्रे, काळे झेंडे घेऊन मराठी भाषकांनी प्रचंड मिरवणूक काढली. हजारो मराठी भाषकांनी पुन्हा एकदा महाराष्ट्रात सहभागी होण्याचा वज्रनिर्धार बोलून दाखवला. तथापि, यामुळे कर्नाटक पोलीस व शासनाचा तिळपापड झाला. त्यांनी गेल्या दोन-तीन दिवसांपासून काळादिन आंदोलनात सहभागी झालेल्या मराठी तरुणांचा घरोघरी जाऊन शोध चालू ठेवला आहे. घरात घुसून पालकांच्या समोरच अमानुष मारहाण सुरू केली आहे.

या प्रकारामुळे अनेक मराठी भाषकांना भूमिगत व्हावे लागले आहे. या प्रकरणी कर्नाटक पोलिसांनी आत्तापर्यंत २०हून अधिक तरुणांना अटक केली आहे. त्यांना पोलीस कोठडी द्यायची की न्यायालयीन कोठडी, यावरून दिवसभर कायदेशीर खल सुरू होता. रात्री उशिरापर्यंत ही प्रक्रिया सुरू होती.

महापालिका बरखास्तीची मागणी

कन्नड वेदिका संघटनेने मराठी भाषकांचे वर्चस्व असलेली बेळगाव महापालिका बरखास्त करण्याची मागणी कर्नाटक शासनाकडे केली आहे. शासनाने त्याची दखल घेत महापालिका बरखास्त करण्याच्या दृष्टीने चाचपणी सुरू केल्याचे वृत्त आहे. तर मराठी भाषकांनी जिल्हाधिकाऱ्यांकडे तक्रार केली असता त्यांनी मनसेचे नेते राज ठाकरे यांची चित्रफीत दाखवून त्यांनी सीमाभाग बेळगावातच असावा या विधानाचा संदर्भ दिला. तुमचेच नेते जे बोलतात त्याला सहकार्य का करत नाही, असा प्रश्न त्यांनी केला.