शिवाजी विद्यापीठात पुनर्परीक्षेसाठी अभाविपची निदर्शने

कोल्हापूर : शिवाजी विद्यापीठाच्या परीक्षा देताना विविध समस्यांमुळे वंचित राहिलेल्या विद्यार्थ्यांच्या परीक्षा पुनश्च घेण्यात याव्यात, या मागणीसाठी अभाविपने सोमवारी विद्यापीठासमोर ठिय्या आंदोलन केले. करोनासारख्या महामारीमुळे शैक्षणिक क्षेत्राचे नुकसान झाले. शिवाजी विद्यापीठाने सन २०२१-२२ वर्षांची सर्व अभ्यक्रमांची परीक्षा ऑनलाइन पद्धतीने घेतली. विद्यापीठाच्या परीक्षा सॉफ्टवेअरमध्ये त्रुटी असल्याने अनेक विद्यार्थ्यांना परीक्षेला मुकावे लागले आहे. महाविद्यालयांकडे विद्यार्थ्यांनी अर्जाद्वारे तक्रार केली आहे. अनेक विद्यार्थ्यांचे निकाल चुकीचे लागले आहेत. विद्यापीठाच्या निष्काळजीपणामुळे व परीक्षा पद्धतीतील चुकांमुळे हा सर्व परीक्षेतील गोंधळ निर्माण झाला आहे, असा आरोप अभाविपने आज केला.