सत्ता असो वा नसो सामाजिक कामाची बांधिलकी कायम ठेवा- शरद पवार

सत्ता असो, वा नसो राष्ट्रवादी काँग्रेसला त्याची चिंता नाही. आम्ही जरी विरोधात असलो, तरी विकासात सातत्य ठेवण्याला प्राधान्य असून, सामाजिक बांधिलकी कायम ठेवा, राष्ट्रवादी काँग्रेसच्या पाठीशी ठाम राहा, असे आवाहन ज्येष्ठ नेते खासदार शरद पवार यांनी केले. राष्ट्रवादी काँग्रेस हे सर्वसामान्यांचे कुटुंबच असून, त्यांच्या हितार्थ आम्ही कटिबद्ध असल्याची ग्वाही त्यांनी दिली.
राष्ट्रवादी काँग्रेसतर्फे पाटण येथे आयोजित शेतकरी मेळाव्यात ते बोलत होते. विधानपरिषदेचे सभापती रामराजे निंबाळकर अध्यक्षस्थानी असलेल्या या मेळाव्याला सातारा जिल्हा परिषदेचे अध्यक्ष माणिकराव सोनवलकर, माजी खासदार लक्ष्मणराव पाटील, ज्येष्ठ नेते तात्या दिवशीकर, आमदार व माजी मंत्री जयंत पाटील, मकरंद पाटील, बाळासाहेब पाटील, प्रभाकर घार्गे, माथाडी कामगार नेते आमदार नरेंद्र पाटील, पाटण बाजार समितीचे सभापती विक्रमबाबा पाटणकर आदींची उपस्थिती होती.
शरद पवार म्हणाले, की प्रभावी नेत्यांचा तालुका म्हणून पाटणचा लौकिक होता. या भागाने राज्याला विजेचा प्रकाश दिला. मात्र, आजही इथल्या अनेक गावात वीज नाही, पुनर्वसनासह अनेक कामे प्रलंबित असून, या परिस्थितीत बदलासाठी नव्या दमाचे नेतृत्व येथे हवे आहे. पाटण तालुक्यात वीज नव्हती, रस्ते नव्हते पण, आम्ही अगदी डोंगर माथ्यावर वीज व रस्त्यांची सुविधा दिली. मात्र, आजही काही कामे प्रलंबित असून, कार्यसम्राटांच्या मतदारसंघातील कार्य केवळ प्रसिद्धीशी संबंधितच असते, असा टोला त्यांनी लगावला. पहिल्यांदा दणका आणि पुन्हा २५ वर्षांची सत्ता असा या तालुक्याचा न्याय असल्याने आता नव्या नेतृत्वाकडून विकासाची २५ वष्रे राहणार असल्याचा विश्वास त्यांनी दिला.
सातारा जिल्ह्यातील माण-खटाव, कराड दक्षिण व पाटणला राष्ट्रवादीचा आमदार नाही. पण इथे आम्ही लक्ष घालणार असून, रामराजे निंबाळकर, प्रभाकर घार्गे व नरेंद्र पाटील हे विधानपरिषद सदस्य या तीन मतदारसंघाचे पालकत्व घेऊन लक्ष घालतील. आपल्या निधीतून २५ लाख याप्रमाणे या मतदारसंघांना त्यांनी निधी द्यावा. माझ्या खासदार फंडातील १ कोटींचा निधी मी पाटणला देणार असल्याचे त्यांनी जाहीर केले. स्वर्गीय अण्णासाहेब पाटलांनी मुंबईत कष्टकऱ्यांच्या हितार्थ संघर्षांची भूमिका घेऊन त्यांचे नेतृत्व केले. येथील राष्ट्रवादीचे नेतृत्वही समाजासाठी, उपेक्षितांसाठी कार्यरत राहील. आपण केंद्रीय कृषिमंत्री असताना, शेतकऱ्यांचे हित जोपासले. कृषिमालाला जास्तीत जास्त दर देण्याचा प्रयत्न केला. कापसाला साडेपाच हजार रुपये दर आम्ही दिला. आज मात्र कापसाला ३ हजार ४०० रुपये इतकाच दर मिळत असल्याचे त्यांनी नमूद केले.
जयंत पाटील म्हणाले, की लोकसभेच्या निवडणुकीपासून न पेलणारी आश्वासने देण्याचा पायंडा विद्यमान सरकारने पाडला आहे. शेतकऱ्यांकडे शासनाने लक्ष द्यावे ही माफक अपेक्षाही फोल ठरत असून, आपत्तीग्रस्तांना मदतीचा हात देण्याची दानतही या सरकारमध्ये नाही. मोदी असो वा, फडणविसांच्या राज्यात कोणताही घटक समाधानी नाही. सर्वाना बरोबर घेऊन जाण्याची सरकारची भूमिका हवी. पण, तसे घडत नाही. हे शासन केवळ भांडवलदारांचे पाठिराखे असल्याची टीका त्यांनी केली.
रामराजे निंबाळकर, विक्रमसिंह पाटणकर, सत्यजितसिंह पाटणकर यांचीही भाषणे झाली.
प्रमुख नेत्यांची अनुपस्थिती
राष्ट्रवादी काँग्रेस पक्षातर्फे  जवळपास सव्वा वर्षांनंतर होणाऱ्या या आयोजित पक्षीय कार्यक्रमाला निमंत्रण पत्रिकेवरील मान्यवरांची राहिलेली अनुपस्थिती हा मेळाव्याइतकाच चर्चेचा विषय बनून राहिला होता. माजी केंद्रीयमंत्री प्रफुल्ल पटेल, खासदार उदयनराजे भोसले, आमदार शिवेंद्रराजे भोसले, आमदार व माजी मंत्री शशिकांत शिंदे यांची अनुपस्थिती प्राकर्षांने जाणवत होती.