लंडन : दक्षिण आफ्रिका वेगवान गोलंदाज लुंगी एन्गिडीने अखेरच्या दोन षटकांत तीन बळी मिळवत दक्षिण आफ्रिकेला इंग्लंडविरुद्ध एक धावेने रोमहर्षक विजय मिळवून दिला. त्यामुळे आफ्रिकेने तीन सामन्यांच्या मालिकेत १-० अशी आघाडी घेतली आहे. दक्षिण आफ्रिकेने प्रथम फलंदाजी करताना २० षटकांत ८ बाद १७७ धावा केल्या. यात टेंबा बव्हुमा (४३), क्विंटन डी कॉक (३१) आणि रॅसी व्हॅन डर दुसेन (३१) यांचे महत्त्वाचे योगदान होते. मग जेसन रॉय आणि कर्णधार ईऑन मार्गन यांच्या अर्धशतकांच्या बळावर इंग्लंडने दमदार सुरुवात केली. परंतु अखेरच्या तीन षटकांत इंग्लंडने २४ धावा काढताना सहा फलंदाज गमावले. त्यामुळे इंग्लंडला २० षटकांत ९ बाद १७६ धावाच करता आल्या.
