भारतीय कसोटी संघात तिसऱ्या क्रमांकावर फलंदाजी करणाऱ्या चेतेश्वर पुजाराच्या खांद्यावर आता आणखी एक महत्वाची जबाबदारी आलेली आहे. चेतेश्वर पुजाराची बायको पुजाने गुरुवारी एका गोंडस मुलीला जन्म दिला आहे. याचवेळी चेतेश्वर पुजाराच्या सौराष्ट्र संघाने विजय हजारे करंडकात बडोद्यावर मात करुन उपांत्य फेरीत प्रवेश केला आहे. त्यामुळे पुजारासाठी आपल्या मुलीचा जन्म हा दुहेरी आनंद मिळाल्यासारखा झाला आहे.

यावेळी चेतेश्वर पुजाराने आपली बायको पुजा आणि लहानग्या मुलीला सोबत घेऊन एक फोटो आपल्या ट्विटर अकाऊंटवर शेअर केला आहे. क्रिकेटसोबत आपण आता वडिलांची जबाबदारी पार पाडण्यासाठी तयार असल्याचं चेतेश्वरने म्हटलं आहे.

ही बातमी शेअर केल्यानंतर चेतेश्वर पुजाराच्या सहकाऱ्यांनीही ट्विटरवर त्याचं अभिनंदन केलं आहे.

काही महिन्यांपूर्वी चेतेश्वर पुजाराने आपण बाबा बनणार असल्याची बातमी ट्विटरवर शेअर केली होती.

रविवारी सौराष्ट्राची उपांत्य फेरीत आंध्र प्रदेशशी गाठ पडणार आहे. त्यामुळे या सामन्यात सौराष्ट्राचा संघ आणि चेतेश्वर पुजारा कशी कामगिरी करतोय याकडे सर्वांचं लक्ष असणार आहे.