भारताच्या प्रमोद भगत आणि सुकांत कदम यांनी शनिवारी दुबई पॅराबॅडमिंटन स्पर्धेची अंतिम फेरी गाठली. ‘एसएल३’ पुरुष एकेरी गटात जागतिक क्रमवारीत अग्रस्थानावर असलेल्या प्रमोदने मलेशियाच्या मुहम्मद हुझैरी अब्दुल मालिकचा २१-७, २१-१७ असा परभव केला. अंतिम फेरीत त्याची भारताच्याच कुमार नितेशशी गाठ पडणार आहे. पुरुष दुहेरीत प्रमोदने मनोज सरकारच्या साथीने मोहम्मद अरवाज अन्सारी आणि दीप रंजन बिसोई या भारताच्या जोडीचा २१-१९, २३-२१ असा पाडाव केला. अंतिम फेरीत त्यांची सुकांत आणि कुमार जोडीशी गाठ पडेल. मिश्र दुहेरीत प्रमोद आणि पाला कोहली जोडीने फ्रान्सच्या ल्युकास मझूर आणि फौस्टिन नोएल जोडीकडून १७-२१, ५-२१ अशी हार पत्करली.
