सलामीवीर रोहित शर्माचा अपवाद वगळता अन्य फलंदाजांनी केलेल्या हाराकिरीमुळे सिडनी वन-डे सामन्यात भारतीय संघाला पराभवाचा सामना करावा लागला आहे. झाय रिचर्डसन आणि जेसन बेहरनडॉर्फने केलेल्या भेदर माऱ्यासमोर भारताची फलंदाजी पुरती कोलमडली. ५० षटकांमध्ये भारत ९ गड्यांच्या मोबदल्यात २५४ धावांपर्यंत मजल मारु शकला. अखेरीस ऑस्ट्रेलियाने ३४ धावांनी बाजी मारत ३ सामन्यांच्या मालिकेत १-० अशी आघाडी घेतली आहे. आंतरराष्ट्रीय क्रिकेटमधला ऑस्ट्रेलियन संघाचा हा एक हजारावा विजय ठरला आहे. ऑस्ट्रेलियाने दिलेल्या २८९ धावांचा पाठलाग करताना भारताची सुरुवात अतिशय खराब झाली. शिखर, विराट आणि रायुडू हे झटपट माघारी परतले. यानंतर रोहित शर्माने धोनीच्या साथीने भारताचा डाव सावरला. रोहित शर्माने नेटाने ऑस्ट्रेलियन माऱ्याचा सामना करत १३३ धावांची शतकी खेळी उभारली. मात्र धोनीचा अपवाद वगळता एकही फलंदाज त्याला योग्य साथ न देऊ शकल्यामुळे ऑस्ट्रेलियाने पहिल्या सामन्यात बाजी मारली. मधल्या फळीत धोनीने ५१ धावांची अर्धशतकी खेळी करुन रोहितला चांगली साथ दिली खरी, मात्र यासाठी त्याने तब्बल ९६ चेंडू खर्ची घातले. या संथ खेळीचा फटका पुढे भारताला बसला. अखेरच्या फळीत भुवनेश्वर कुमारने फटकेबाजी करण्याचा प्रयत्न केला, मात्र तोपर्यंत उशीर झाला होता. ऑस्ट्रेलियाकडून रिचर्डसनने ४, बेहरनडॉर्फने २ बळी घेतले. त्यांना पिटर सिडल आणि स्टॉयनिसने १-१ बळी घेत चांगली साथ दिली. त्याआधी, पिटर हँडस्काँब, उस्मान ख्वाजा आणि शॉन मार्श यांनी झळकावलेल्या अर्धशतकांच्या जोरावर पहिल्या वन-डे सामन्यात यजमान ऑस्ट्रेलियाने भारतासमोर २८९ धावांचं आव्हान ठेवलं. कांगारुंनी ५० षटकात ५ गड्यांच्या मोबदल्यात २८८ धावांपर्यंत मजल मारली. नाणेफेक जिंकून प्रथम फलंदाजी करण्याचा निर्णय घेतलेल्या ऑस्ट्रेलियाची सुरुवात खराब झाली, कर्णधार फिंच त्रिफळाचीत होऊन माघारी परतला. यानंतर उस्मान ख्वाजा, शॉन मार्श आणि पीटर हँडस्काँब यांनी एकामागून एक अर्धशतकी खेळी करुन संघाचा डाव सावरला. तिन्ही फलंदाजांनी भारतीय गोलंदाजीचा नेटाने सामना केला. हँडस्काँबने अखेरच्या षटकांमध्ये फटकेबाजी करत यजमान संघाला २०० धावांचा टप्पा ओलांडून दिला. अखेरच्या षटकांमध्ये फटकेबाजी करण्याच्या नादात हँडस्काँब माघारी परतला. भारताकडून कुलदीप यादव आणि भुवनेश्वर कुमारने प्रत्येकी २-२ बळी घेतले. त्यांना रविंद्र जाडेजाने १ बळी घेत चांगली साथ दिली. मोहम्मद शमीने १० षटकात ४६ धावा देत ऑस्ट्रेलियाच्या धावसंख्येला वेसण घातली, मात्र त्याला विकेट मिळवता आली नाही.