महेंद्रसिंग धोनीच्या ट्वेन्टी-२० क्रिकेटमधील भविष्याबाबतचा निर्णय निवड समितीवर सोपवा, असा सल्ला भारतीय संघाचे माजी कर्णधार कपिलदेव यांनी दिला आहे. भारताला १९८३चा विश्वचषक जिंकून देणाऱ्या कपिलदेव यांनी ३६ वर्षीय धोनीच्या सध्याच्या फॉर्मची प्रशंसा केली, परंतु ट्वेन्टी-२० क्रिकेटमध्ये त्याला आणखी संधी द्यायची की नाही, हा निर्णय निवड समितीला घ्यावा लागेल, असेही ते म्हणाले.

‘कोणताही खेळाडू आयुष्यभर खेळत नाही. धोनी सध्या चांगल्या फॉर्मात आहे, परंतु त्याच्या ट्वेन्टी-२० क्रिकेटमधील निर्णय निवड समितीवर सोपवायला हवा. ते त्यांची कामगिरी उत्तमरीत्या पार पाडत आहेत. मी मत व्यक्त करू शकतो आणि त्यावरून पुन्हा गोंधळाचे वातावरण निर्माण होऊ शकते. तसे मला करायचे नाही. त्यामुळे निवड समितीला त्यांचा निर्णय घेऊ द्या,’ असे कपिलदेव म्हणाले.