थिसारा परेराच्या अष्टपैलू कामगिरीच्या बळावर किंग्ज इलेव्हन पंजाबने चॅम्पियन्स लीग ट्वेन्टी-२० क्रिकेट स्पध्रेत गुरुवारी होबार्ट हरिकेन्सवर १४ चेंडू आणि पाच विकेट राखून विजय मिळवला. होबार्टने प्रथम फलंदाजी करताना २० षटकांमध्ये ६ बाद १४४ धावा केल्या. अखेरच्या षटकांमध्ये जोनाथल वेल्स आणि ट्रेव्हिस ब्रिट यांनी जलदगतीने प्रत्येकी २८ धावा जमावल्या. पंजाबकडून थिसाराने १७ धावांत २ बळी मिळवले. होबार्टच्या आव्हानाचा पाठलाग करताना पंजाबची सुरुवात चांगली झाली नसली तरी ग्लेन मॅक्सवेलने २५ चेंडूंत ४ चौकार २ षटकारांच्या जोरावर ४३ धावांची महत्वपूर्ण खेळी साकारली. मग पंजाबची ५ बाद ७७ अशी अवस्था झाली. परंतु जॉर्ज बेली (नाबाद ३४) आणि थिसारा परेरा (नाबाद ३५) यांनी सहाव्या विकेटसाठी ६९ धावांची भागीदारी रचून पंजाबला सामना जिंकून दिला.
