दुसऱ्या क्रमांकावरील लेसिस्टर सिटीवर ४-० अशी मात लेसिस्टर : गेल्या आठवडय़ातच क्लब विश्वचषक फुटबॉल स्पर्धेचे विजेतेपद संघाला मिळवून देण्यात मोलाची भूमिका बजावणाऱ्या रॉबटरे फर्मिनोने केलेल्या दोन गोलच्या बळावर लिव्हरपूलने गुरुवारी रात्री झालेल्या इंग्लिश प्रीमियर लीग फुटबॉलमध्ये दुसऱ्या क्रमांकावरील लेसिस्टर सिटीचा ४-० असा धुव्वा उडवून गुणतालिकेतील अग्रस्थान अधिक भक्कम केले. किंग पॉवर स्टेडियमवर झालेल्या या सामन्यात फर्मिनोने अनुक्रमे ३१ आणि ७४व्या मिनिटाला गोल नोंदवले. जेम्स मिल्नर (७१) आणि अ‍ॅलेक्झांडर अर्नाल्ड (७८) यांनी प्रत्येकी एक गोल करून फर्मिनोला उत्तम साथ दिली. या विजयामुळे लिव्हरपूलच्या खात्यात १८ सामन्यांतून सर्वाधिक ५२ गुण जमा असून लेसिस्टर सिटी १९ सामन्यांतील ३९ गुणांसह दुसऱ्या स्थानी आहे. अन्य सामन्यांत मँचेस्टर युनायटेडने न्यू कॅस्टलला ४-१ अशी धूळ चारली. अ‍ॅन्थोनी मार्शल (२४ आणि ५१वे मिनिट), मार्सन ग्रीनवूड (३६) आणि मार्कस रशफोर्ड (४१) यांनी युनायटेडच्या विजयात मोलाची भूमिका बजावली.
