नवी दिल्ली : दिल्ली उच्च न्यायालयाने सोमवारी भारतीय टेबल टेनिस महासंघाला खडे बोल सुनावताना आघाडीची खेळाडू मनिका बत्राला ‘क्लीन चिट’ देण्याचे आदेश दिले आहेत. आंतरराष्ट्रीय स्पर्धेच्या निवडीसाठी राष्ट्रीय प्रशिक्षण शिबिरात अनिवार्य हजेरीच्या महासंघाच्या नियमाबाबत आव्हान देणारी याचिका मनिकाने उच्च न्यायालयात दाखल केली होती. त्याआधी तिने राष्ट्रीय प्रशिक्षक सौम्यदीप रॉय यांच्यावर सामनानिश्चितीसाठी दडपण टाकल्याचाही आरोप केला होता. ‘‘महासंघाच्या कारभाराबाबत मी समाधानी नाही. तुम्ही एका व्यक्तीची कोणत्याही कारणाशिवाय चौकशी करत आहात. तिने वैयक्तिक प्रशिक्षकांचे मार्गदर्शन घेऊन कोणतीही चूक केली नसल्याचे स्पष्ट झाले आहे. खेळाडूंना न्यायालयात धाव घ्यावी लागणे हे देशासाठी योग्य नाही. तुम्ही कोणत्याही चौकशीविना तिला ‘क्लीन चिट’ दिली पाहिजे,’’ असे न्यायमूर्ती रेखा पल्ली म्हणाल्या.
