कडव्या संघर्षांची मेजवानी

गट ड

• ब्राझील : आक्रमक रणनीती हेच अस्त्र असलेला ब्राझिलचा संघ चौथ्यांदा कुमार विश्वचषक उंचावण्याच्या निर्धाराने भारतात दाखल झाला आहे. मुख्य स्पध्रेला सुरुवात होण्यापूर्वी ब्राझीलचा संघ सराव सामन्यातून भारतातील वातावरणाशी समरस होण्याचा प्रयत्न करणार आहे. कुमार विश्वचषक स्पध्रेत सर्वाधिक ७५ सामने ब्राझीलच्या नावावर आहेत. त्यात सर्वाधिक ४७ विजय आणि १६६ गोल्सचा विक्रम त्यांनी केला आहे. त्यांनी १९९७, ९९ आणि २००३मध्ये जेतेपद पटकावले आहे. कुमार विश्वचषक स्पध्रेच्या इतिहासात पहिला गोल नोंदवण्याचा मान ब्राझिलला मिळाला आहे. १९८५च्या पदार्पणीय लढतीत ब्राझीलच्या बिस्मार्कने कतारविरुद्ध गोल केला. दक्षिण अमेरिकन १७ वर्षांखालील अजिंक्यपद स्पध्रेचे जेतेपद पटकावून ब्राझीलने विश्वचषक स्पध्रेची पात्रता निश्चित केली. त्यांनी १७ पैकी १२ वेळा दक्षिण अमेरिकन स्पध्रेचे जेतेपद पटकावले आहे.
• स्पेन : यूएएफ युरोपियन १७ वर्षांखालील स्पध्रेची तीन आणि अन्य स्पर्धाची पाच जेतेपद नावावर असूनही स्पेनला कुमार विश्वचषक जिंकण्यात अद्याप अपयश आले आहे. एकही जेतेपद न पटकावता सर्वाधिक तीन वेळा विश्वचषक स्पध्रेच्या अंतिम फेरीत पोहोचणारा स्पेन हा पहिलाच संघ. त्यांना १९९१, २००३ आणि २००७ मध्ये अनुक्रमे घाना, ब्राझील आणि नायजेरियाकडून पराभव पत्करावा लागल्याने उपविजेतेपदावर समाधान मानावे लागले होते. विश्वचषक स्पध्रेच्या इतिहासात मोठय़ा फरकाने विजय मिळवण्याचा विक्रम स्पेनच्या नावावर आहे. त्यांनी 1997मध्ये न्यूझीलंडवर १३-० असा विजय मिळवला होता. विश्वचषक स्पध्रेत शंभरहून अधिक गोल करण्याचा मान ब्राझील (१६६) आणि नायजेरिया (१४९) यांच्या नावावर आहे. स्पेनला या यादीत स्थान मिळवण्यासाठी अवघ्या तीन गोलची आवश्यकता आहे. त्यांच्यासोबत मेक्सिको (९७), जर्मनी (९२) आणि घाना (८६) यांनाही हा विक्रम खुणावत आहे.
• उत्तर कोरिया : २००५मध्ये उत्तर कोरियाने कुमार विश्वचषक स्पध्रेत पदार्पण केले आणि त्यांनी सर्वोत्तम कामगिरीची नोंद करताना उपांत्यपूर्व फेरीत प्रवेश केला होता. त्यानंतर त्यांनी तीनदा या स्पध्रेत सहभाग घेतला. उत्तर कोरियाने विश्वचषक स्पध्रेतील १५ सामन्यांपैकी ५ लढती १-१ अशा बरोबरीत सोडवल्या आहेत. आत्तापर्यंत चारही विश्वचषक स्पर्धामध्ये कोरियाला पहिल्या लढतीत विजय मिळवण्यात अपयश आले आहे. त्यात तीन पराभव आणि एका अनिर्णीत निकालाची नोंद आहे.
• नायजर : भारत आणि न्यू कॅलेडोनिया यांच्यासह विश्वचषक स्पध्रेत पदार्पण करणारा नायजर हा तिसरा संघ आहे. तसेच आफ्रिकन खंडातून या स्पध्रेत खेळणाऱ्या २०व्या संघाचा मान त्यांनी पटकावला. आत्तापर्यंत युरोपियन खंडातून २२ संघांनी विश्वचषक स्पध्रेत सहभाग घेतले आहेत. मालीसह विश्वचषक स्पध्रेची पात्रता निश्चित करणारा नायजर हा अखेरचा संघ आहे. त्यांनी आफ्रिका चषक स्पध्रेत तंझानियावर १-० असा विजय मिळवून चौथे स्थान पटकावत ही कामगिरी केली. आफ्रिका चषक स्पध्रेच्या दुसऱ्या पात्रता फेरीत नायजरने गतविजेत्या नायजेरियाला नमवून धक्कादायक निकालाची नोंद केली. पहिल्या लढतीत ०-१ अशा पिछाडीवरून नायजरने परतीच्या लढतीत ३-१ असा निकाल नोंदवला आणि गतविजेत्यांचे आव्हान संपुष्टात आणले.

प्रेक्षकांच्या मोठय़ा आवाजाचे केंद्र कोची स्टेडियम

क्रिकेट, फुटबॉल, अ‍ॅथलेटिक्स आदी खेळांबाबत केरळमधील लोकांमध्ये असलेली आवड लक्षात घेऊनच कलूर (कोची ) येथे आंतरराष्ट्रीय दर्जाचे स्टेडियम बांधण्यात आले आहे. १९९६ मध्ये फुटबॉलकरिता हे स्टेडियम लोकार्पण करण्यात आले. जागतिक स्तरावरील मोठय़ा स्टेडियममध्ये त्याची गणना केली जाते. पाऊण लाख प्रेक्षक बसू शकतील एवढी त्याची क्षमता आहे. क्रिकेटच्या वाढत्या लोकप्रियतेमुळे येथे क्रिकेटचे आंतरराष्ट्रीय सामनेही आयोजित केले जातात. येथील प्रेक्षकांच्या आवाजाचा हीच अनेक वेळा पंचांसाठी डोकेदुखी असते. प्रेक्षकांना शांत बसण्याची विनंती अनेक वेळा करावी लागते.

१९९८ मध्ये येथे ऑस्ट्रेलिया व भारत यांच्यातील एक दिवसीय क्रिकेट सामन्याचे आयोजन करण्यात आले होते. २००५ मध्ये येथे भारत व पाकिस्तान या दोन पारंपरिक संघांमधील एक दिवसीय सामनाही येथे घेण्यात आला होता. या सामन्यांसह क्रिकेटचा प्रत्येक आंतरराष्ट्रीय सामना हाऊसफुल्ल झाला आहे. मुंबईच्या सचिन तेंडुलकरला येथील लोक देवाचीच उपमा देतात. त्यामुळेच येथील स्टेडियमच्या एका गॅलरीचे तेंडुलकर गॅलरी असे नामकरण करण्यात आले आहे.  फुटबॉलच्या व्यावसायिक लीग सामन्यांकरिताही येथे भरपूर गर्दी असते. सरासरी ४० हजारहून अधिक प्रेक्षक उपस्थित असतात. चिराग युनायटेड व केरळा ब्लास्टर्स या दोन्ही व्यावसायिक फुटबॉल क्लबचे हे घरचे मैदान आहे.

संकलन : स्वदेश घाणेकर व मिलिंद ढमढेरे