महिला संघानं वर्ल्ड कप जिंकताच पंतप्रधान नरेंद्र मोदींनी केलं भारताच्या लेकींचं कौतुक; म्हणाले…

पंतप्रधान नरेंद्र मोदी यांनी एक्सवर पोस्ट करत भारताच्या लेकींचं कौतुक केले. ते म्हणाले, “आयसीसी महिला क्रिकेट विश्वचषक २०२५ च्या अंतिम सामन्यात भारतीय संघाने शानदार विजय मिळवला.”

पंतप्रधान नरेंद्र मोदी पुढे म्हणाले, “अंतिम सामन्यातील संघाची कामगिरी उच्च कौशल्य आणि आत्मविश्वासाने भरलेली होती. संपूर्ण स्पर्धेत संघाने उत्तम सांघिक कामगिरी आणि दृढनिश्चय दाखवला. सर्व खेळाडूंचे अभिनंदन. हा ऐतिहासिक विजय भविष्यात अनेकांना खेळाप्रती रस घेण्यास प्रेरित करेल.”

नवी मुंबईतील डॉ. डीवाय पाटील स्टेडियमवर झालेल्या अंतिम सामन्यात हरमनप्रीत कौरच्या संघाच्या दक्षिण आफ्रिकेला नमवत जगज्जेतेपदाला गवसणी घातली. भारतीय संघाने दक्षिण आफ्रिकेसमोर विजयासाठी २९९ धावांचे आव्हान ठेवले होते. या धावांचा पाठलाग करण्यासाठी आलेल्या दक्षिण आफ्रिकेकडून कर्णधार लॉरा वूल्व्हडार्टने दमदार शतकी खेळी केली. तिने १०१ धावा केल्या. भारतीय संघाकडून गोलंदाजी करताना दीप्ती शर्माने सर्वाधिक ५ गडी बाद केले. भारताने हा सामना ५२ धावांनी आपल्या नावावर केला.