Bajrang Punia On Vinesh Phogat : विनेश फोगटच्या वजनाबाबत बजरंग पुनियाने आधीच व्यक्त केली होती शंका; नेमकं काय म्हटलं होतं?

बजरंग पुनियाने काय म्हटलं होतं?

“माझं विनेश फोगटशी (Vinesh Phogat) बोलणं झालं होतं. तेव्हा मी म्हटलं होतं की, आता पहिलं टार्गेट हे अंतिम लढतीकडे राहुदे. कारण कोणताही खेळाडू विजयाच्या आधी जल्लोष करत नाही. जर विजयाच्या आधीच आनंद व्यक्त केला आणि त्यामध्येच समाधान मानलं तर कोणताही खेळाडू चांगली कामगिरी करू शकत नाही. तसेच गोल्ड मेडलचं जे टार्गेट आहे, त्याबाबतच बोलणं झालं होतं. तसेच वजन कमी करण्यासंदर्भातही बोलणं झालं होतं”, असं बजरंग पुनियाने (Bajrang Punia) म्हटलं.

हेही वाचा : विनेश फोगट पॅरिस ऑलिम्पिकमधून अपात्र ठरल्यानंतर पंतप्रधान मोदींची प्रतिक्रिया; म्हणाले…

“कारण ५० किलो वजनात खेळणं खूप कठीण होऊन जातं. वजन कमी करण्यामध्ये मुलगा आणि मुलीमध्ये खूप फरक असतो. कारण मुलाचं वजन लवकर कमी होतं. पण मुलींना वजन कमी करण्यामध्ये अडचणी येतात. विनेश फोगटने तिचं वजन ५० किलोवर आणलं होतं. यासाठी मागील काही महिन्यांपासून तिचा डाएट प्लॅन सुरु होता. त्यामुळे या सर्व गोष्टी आहेत की, खेळाडू कधीही आधी आनंद व्यक्त करत नाही. एका खेळाडूला तेव्हाच आनंद होतो तेव्हा मेडलं मिळवलेलं असतं”, असंही बजरंग पुनियाने म्हटलं होतं.

विनेश फोगाट अंतिम फेरीसाठी अपात्र का?

विनेश फोगाट ऑलिम्पिक स्पर्धेसाठी ५० किलो वजनी गटातून पात्र ठरली होती. पहिल्याच फेरीत गतविजेत्या सुसाकीला हरवून विनेशने सनसनाटी सुरुवात करून पुढे आणखी दोन प्रतिस्पर्ध्यांविरुद्ध जिंकून अंतिम फेरी गाठली होती. अंतिम फेरीपूर्वी सकाळी घेण्यात आलेल्या वजन चाचणीत तिचे वजन अधिक भरल्याने विनेशला अपात्र ठरविण्यात आले.

विनेशचे वजन किती अधिक भरले?

अंतिम फेरीपूर्वी घेण्यात आलेल्या वजन चाचणीत विनेशचे वजन १०० ते १५० ग्रॅम अधिक भरल्याचे समोर आले आहे. ५० किलो वजनी गटात अंतिम तसेच कोणत्याही लढतीपूर्वी स्पर्धक मल्लाचे वजन ५० किलोंपेक्षा अधिक भरणे नियमबाह्य ठरते.

पदक कोणाला मिळणार?

विनेश अपात्र ठरल्यामुळे बुधवारी रात्री होणारा सुवर्णपदकाचा मुकाबला होणार नाही. विनेशची प्रतिस्पर्धी सारा अॅन हिल्डरब्रँटला सुवर्णपदक देण्यात येईल. ही लढतच होणार नसल्यामुळे रौप्यपदक कोणालाच देण्यात येणार नाही.