आयपीएलची पहिली १० पर्व यशस्वीपणे पार पडल्यानंतर, अकराव्या हंगामासाठीचा लिलाव काही दिवसांवर येऊन ठेपलेला आहे. या लिलावात कोणता संघ कोणत्या खेळाडूला आपल्या ताफ्यात दाखल करुन घेणार याची उत्सुकता असतानाच, अकराव्या हंगामाची तारीख जाहीर करण्यात आलेली आहे. ७ एप्रिल ते २७ मे या कालावधीत आयपीएलचा अकरावा हंगाम खेळवला जाणार आहे. यंदाच्या हंगामात सलामीच्या आणि अंतिम सामन्याचा मान मुंबईला देण्यात आलेला आहे. आयपीएल गव्हर्निंग काऊन्सिलचे अध्यक्ष राजीव शुक्ला यांनी यासंदर्भात माहिती दिली. अकराव्या हंगामत आयपीएल सामन्यांच्या वेळात बदल करण्यात आलेली आहे. यंदाच्या हंगामात आयपीएल सामन्यांच्या प्रसारणाचे हक्क स्टार स्पोर्ट्स या वाहिनीकडे देण्यात आलेले आहेत. वाहिनीने केलेल्या विनंतीवरुन संध्याकाळच्या सामन्यांची वेळ ही ५ वाजून ३० मिनीटांनी तर रात्रीच्या सामन्यांची वेळ ७ वाजता करण्यात आलेली आहे.
