IPL 2019 RR vs RCB Updates : रॉयल चॅलेंजर्स बंगळुरू आणि राजस्थान रॉयल्स यांच्यातील लढतीत राजस्थानने बंगळुरूवर ७ गडी राखून मात केली. बंगळुरूने प्रथम फलंदाजी करत ४ बाद १५८ धावा केल्या. या आव्हानाचा पाठलाग करताना सलामीवीर जोस बटलर याच्या अर्धशतकाच्या (५९) बळावर राजस्थानने सामना जिंकला आणि अखेर IPL मध्ये आपले पहिले २ गुण कमावले. बंगळुरुच्या संघाला मात्र अद्याप स्पर्धेत आपले खाते उघडता आलेले नाही. १५९ धावांच्या आव्हानाचा पाठलाग करताना राजस्थानच्या सलामीवीरांनी धडाकेबाज सुरुवात केली. अजिंक्य रहाणे आणि जोस बटलर यांच्या फटकेबाजीमुळे सहाव्या षटकातच राजस्थानने अर्धशतक गाठले. पण कर्णधार अजिंक्य रहाणेला मोठी खेळी करता आली नाही. तो २० चेंडूत २२ धावा करून पायचीत झाला. या खेळीत त्याने ४ चौकार खेचले. जोस बटलरने मात्र आपली फटकेबाजी सुरूच ठेवली आणि दमदार अर्धशतक केले आणि राजस्थानच्या विजयाचा पाया रचला. पण फटकेबाजी करण्याच्या प्रयत्नात बटलर बाद झाला. त्याने ४३ चेंडूत ५९ धावा केल्या. यात ८ चौकार आणि १ षटकार समाविष्ट होता. स्टीव्ह स्मिथने फटकेबाजी करण्याचा प्रयत्न केला, पण तो लवकर बाद झाला. त्याने ३१ चेंडूत ३८ धावा केल्या. अखेर राहुल त्रिपाठीने षटकार मारून सामना जिंकवला. त्याने २३ चेंडूत ३४ धावा केल्या. यात ३ चौकार आणि १ षटकार समाविष्ट होता. त्याआधी, प्रथम फलंदाजी करताना विराट आणि पार्थिव पटेल यांनी बंगळुरूच्या डावाला चांगली सुरुवात करून दिली. पण श्रेयस गोपालच्या गोलंदाजीवर चाचपडत खेळणारा बंगळुरूचा कर्णधार विराट कोहली अखेर त्रिफळाचीत झाला. विराटने २५ चेंडूत २३ धावा केल्या. त्यात ३ चौकारांचा समावेश होता. खेळपट्टीवर स्थिरावण्याचा प्रयत्न करणाऱ्या एबी डीव्हिलियर्सचा श्रेयस गोपाळने स्वतःच्याच गोलंदाजीवर अप्रतिम झेल टिपला आणि बंगळुरूला दुसरा धक्का बसला. डीव्हिलियर्सने ९ चेंडूत २ चौकारांसह १३ धावा केल्या. बंगळुरूच्या धोकादायक फलंदाज शिमरॉन हेटमायर झेलबाद झाला आणि बंगळुरूला तिसरा धक्का बसला. त्याने ९ चेंडूत १ धाव केली. श्रेयस गोपाळने बंगळुरूविरुद्ध अप्रतिम गोलंदाजी करत पहिल्या ३ षटकात ८ धावा देऊन ३ बळी टिपले. त्याने विराट कोहली (२३), एबी डीव्हिलियर्स (१३) आणि शिमरॉन हेटमायर (१) या तिघांना माघारी धाडले. एकीकडे बंगळुरूचे महत्वाचे खेळाडू बाद होत असताना पार्थिव पटेलने मात्र २९ चेंडूत संयमी खेळी करत आपले अर्धशतक पूर्ण केले. पण संयमी अर्धशतकी खेळी करणारा पार्थिव पटेल मोठा फटका खेळताना झेलबाद झाला आणि बंगळुरूला चौथा धक्का बसला. त्याने ४१ चेंडूत ६७ धावा केल्या. यात ९ चौकार आणि १ षटकाराचा समावेश होता. अखेर मार्कस स्टॉयनीसच्या नाबाद ३१ आणि मोईन अलीच्या नाबाद १८ धावांच्या फटकेबाजीमुळे २० षटकात बंगळुरूने ४ बाद १५८ धावांची मजल मारली.
