Diamond League 2022 : नीरज चोप्राने मोडला स्वत:चाच विक्रम; रौप्य पदकावर कोरले नाव

नीरज चोप्राचा ९० मीटर थ्रो थोडक्याक चुकला. परंतु, राष्ट्रीय विक्रमासह त्याने या स्पर्धेतील आतापर्यंतची सर्वात चांगली कामगिरी केली आहे. प्रतिष्ठित डायमंड लीग स्पर्धेत त्याने प्रथमच पहिल्या तीनमध्ये स्थान पटकावले आहे. ऑलिंपिक चॅम्पियन नीरज चोप्राने जागतिक विजेता अँडरसन पीटर्सनंतर दुसरे स्थान पटकावले.

हेही वाचा – IND vs ENG 5th Test Match : हेल्मेटवर कॅमेरा लावून इंग्लंडचा खेळाडू करणार क्षेत्ररक्षण! जाणून घ्या कारण

निरजने केलेल्या कामगिरीमुळे केंद्रीय क्रीडा आणि माहिती व प्रसारण मंत्री अनुराग ठाकूर यांनी त्याचे अभिनंदन केले आहे. अनुराग ठाकूर यांनी लिहिले, “ऑलिंपिक चॅम्पियन नीरज चोप्राने एक नवीन राष्ट्रीय विक्रम केला. २०२२ स्टॉकहोम डायमंड लीगमध्ये वैयक्तिक सर्वोत्तम कामगिरी केली. त्याने ८९.९४ मीटर भालाफेकून स्पर्धेत दुसरे स्थान पटकावले.” ठाकूर यांनी त्याचा व्हिडीओही शेअर केला आहे.

भालाफेकपटू नीरज चोप्रा १५ ते २४ जुलै दरम्यान अमेरिकेतील युजीन येथे होणार्‍या जागतिक चॅम्पियनशिपमध्ये २२ सदस्यीय भारतीय तुकडीचे नेतृत्व करेल. भारतीय संघात १७ पुरुष आणि ५ महिला खेळाडू आहेत. भावना जाट आणि थाळीफेक पटू सीमा पुनिया यांनी या स्पर्धेतून माघार घेतली आहे. दोघींनाही राष्ट्रकुल स्पर्धेच्या तयारीवर लक्ष केंद्रित करायचे आहे.