न्यायाधीश मुकुल मुद्गल यांच्या नेतृत्वाखालील समिती इंडियन प्रीमिअर लीग स्पर्धेतील सट्टेबाजी आणि स्पॉट-फिक्सिंगबाबतचा अहवाल सोमवारी सर्वोच्च न्यायालयात सादर करणार आहे. आम्ही अंतिम अहवाल सादर करणार आहोत. याव्यतिरिक्त मी काहीही माहिती प्रसारमाध्यमांना देऊ शकणार नाही, असे न्यायाधीश मुद्गल यांनी सांगितले.
मुद्गल यांच्यासह अतिरिक्त सॉलिसिटर जनरल एल. नागेश्वर राव, वकील नीलय दत्ता, अमली पदार्थ नियंत्रण विभागाचे उपमहासंचालक बी. बी. मिश्रा व माजी क्रिकेटपटू सौरव गांगुली यांची दिल्लीत बैठक झाली. या बैठकीत अहवालाचा शेवटचा मसुदा निश्चित करण्यात आला. मात्र मुद्गल यांनी ही बैठक झाल्याच्या वृत्ताला दुजोरा दिला नाही. या खटल्याप्रकरणी सर्वोच्च न्यायालयाची पुढील सुनावणी १० नोव्हेंबरला होणार असून, या निर्णयाची बीसीसीआयला प्रतीक्षा आहे.
आयपीएलच्या सहाव्या हंगामात एस. श्रीशांत, अजित चंडिला व अंकित चव्हाण यांना स्पॉट-फिक्सिंग केल्याच्या आरोपांवरून अटक केली होती. याव्यतिरिक्त चेन्नई सुपर किंगचा टीम प्रिन्सिपल गुरुनाथ मयप्पनसह बॉलीवूड अभिनेता विंदू दारासिंग सट्टेबाजीच्या आरोपांवरून तुरुंगात आहेत.