IPL 2020 स्पर्धेत आपल्या धडाकेबाज फलंदाजीच्या जोरावर ठसा उमटवणारा वेस्ट इंडिजचा खेळाडू निकोलस पूरन याने मंगळवारी (१७ नोव्हेंबर) हटके अंदाजात साखरपुडा केला. दीर्घ काळाच्या रिलेशनशिपनंतर पूरनने मैत्रीण कॅथरीना मिगुएलशी साखरपुडा केल्याचा फोटो पोस्ट केला. निकोलस पूरनने आपल्या अधिकृत इंस्टाग्राम हँडलवरून २ फोटो पोस्ट केले. कॅथरीनाला प्रपोज करताना गुडघ्यावर बसून रोमँटिक अंदाजात त्याने तिला अंगठी घातली. कॅथरीनानेही तिच्या इन्स्टाग्रामवर हे फोटो पोस्ट केले आहेत.

निकोलस पूरनने कॅथरीना मिगुएल बरोबरचा फोटो शेअर करत लिहिले की, “कॅथरीनाची साथ म्हणजे देवाने मला दिलेला एक आशीर्वाद आहे. मी आणि कॅथरीना मिगुएल, आम्ही साखरपुडा केल्याचं जाहीर करतो. ही घोषणा करताना मला खूप आनंद होतो आहे. लव्ह यू मिग्स… अखेर तू हो म्हणालीसच”, असं कॅप्शन त्याने या पोस्टसोबत लिहिलं आहे.

पूरननंतर कॅथरीनानेदेखील तिच्या अधिकृत इंस्टाग्राम अकाऊंटवरून दोन फोटो शेअर केले. त्या फोटोंसह तिने लिहिलं, “पूरनने सारं काही सुंदर पद्धतीने जुळवून आणलं. तू माझ्यावर प्रेम करतोस हे माझ्यासाठी वरदानच आहे. मी या गोष्टीसाठी दररोज देवाचे आभार मानते. लव्ह यू निकोलस पूरन!”

निकोलस आणि कॅथरीना IPL 2020 साठी युएईमध्ये एकत्र होते. IPLच्या वेळी कॅथरीना अनेकदा निकोलसला चिअर करताना स्टेडियममध्ये दिसली. आयपीएलमध्ये निकोलसने किंग्ज इलेव्हन पंजाबकडून दमदार कामगिरी केली.