चेन्नई : ‘आयपीएल’च्या पुढील हंगामात महेंद्रसिंह धोनीला कायम ठेवण्याबाबतचा निर्णय सर्व नियम स्पष्ट झाल्यावरच घेण्यात येईल, असे चेन्नई सुपर किंग्जच्या पदाधिकाऱ्याने रविवारी सांगितले. पुढील हंगामात दोन नव्या संघांचा समावेश करण्यात येणार असून खेळाडूंना कायम ठेवण्याबाबतचे नियम अजून ‘बीसीसीआय’ने जाहीर केलेले नाहीत. ‘‘खेळाडूंना संघात कायम ठेवण्याबाबतचे नियम अजून स्पष्ट करण्यात आलेले नाहीत. आम्हाला किती खेळाडूंना संघात कायम राखता येणार हे कळल्यावरच आम्ही पुढील निर्णय घेऊ,’’ असे चेन्नई संघाचा पदाधिकारी म्हणाला. धोनीच्या नेतृत्वात चेन्नईने यंदा चौथ्यांदा ‘आयपीएल’चे जेतेपद पटकावले.
