गतविजेतेपदाचे दडपण नक्कीच असेल, पण..

प्रो कुस्ती लीगच्या दुसऱ्या पर्वाला नव्या वर्षांच्या दुसऱ्याच दिवशी सुरुवात होणार आहे. ३० डिसेंबरला गतविजेत्या मुंबई महारथी संघाची घोषणा करण्यात आली. या संघाचे नेतृत्व कॅनडाच्या ऑलिम्पिकपदक विजेत्या एरिका एलिझाबेथ विबेकडे सोपवण्यात आले असले तरी या संघात महाराष्ट्राचा एकमेव मल्ल पाहायला मिळतो आणि तो म्हणजे राहुल आवारे. आतापर्यंत आंतराष्ट्रीय स्तरावर राहुलची कामगिरी कौतुकास्पद राहिलेली आहे. या लीगचा खेळ उंचावण्यासाठी किती फायदा झाला, गतविजेतेपदाचे किती दडपण आहे, अनुभवी खेळाडूंचा किती फायदा होईल, याबाबतचे मत राहुलने दिलेल्या मुलाखतीमध्ये व्यक्त केले.

* प्रो कुस्ती लीगचा तुला एक खेळाडू म्हणून किती फायदा होतो?

पहिल्या हंगामात आम्ही चांगली कामगिरी केली होती. या वर्षी संघामध्ये आंतरराष्ट्रीय दर्जावरील अनुभवी खेळाडू आहेत. त्याचबरोबर प्रतिस्पर्धी संघातही दिग्गज खेळाडू आहेत, त्यांच्याबरोबर मला खेळायला मिळते. हीच गोष्ट आंतरराष्ट्रीय स्तरावरही दुर्मीळ असते. यापूर्वी फक्त काही स्पर्धामध्ये त्यांच्याविरुद्ध खेळायला मिळत होते. पण या लीगच्या माध्यमातून हे खेळाडू कसे सराव करतात, त्यांची मानसिकता काय असते, ते मनोधैर्य कसे उंचावतात, हे सारे समजायला आणि त्या पद्धतीने घडायला मदत होते. लीगमध्ये पराभूत झालो तरी लक्षात येते की यापुढे आपण नेमके काय करायला हवे.

* तुमच्या संघाचे नेतृत्व एरिका एलिझाबेथ विबेसारख्या अनुभवी महिला कुस्तीपटूकडे सोपवण्यात आले आहे, त्याबद्दल काय सांगशील?

एरिका कॅनडाची आहे. २०१५ साली तिने ऑलिम्पिक पदक मिळवले. या पदकासाठी तिने दहा वर्षे मेहनत घेतली. पण ऑलिम्पिक पदक पटकावल्यावरही तिचे पाय जमिनीवर आहे. तिला अहंकार, गर्व शिवतही नाही. एरिका पदक मिळवेल, याबाबत फारशी कुणाला अपेक्षा नव्हती. पण त्यासाठी तिने अथक मेहनत व जिद्द कायम ठेवली आणि पदक पटकावले. ही गोष्ट तिच्याकडून साऱ्यांनीच शिकण्यासारखी आहे. एक खेळाडू म्हणून तर तिच्याकडून बरेच शिकलो तर आहेच, पण एक व्यक्ती म्हणूनही ती महान आहे. एरिकामुळे संघाचे मनोबल नक्कीच वाढेल.

* या लीगचे तुम्ही गतविजेते आहात, त्याचे यावेळी किती दडपण असेल?

दडपण नक्कीच आहे. पण पहिली लढत झाल्यावर हे दडपण थोडे हलके होईल. कारण आम्ही गतविजेते आहोत आणि त्यामुळे यावर्षी आमच्याकडून अपेक्षा उंचावलेल्या आहेत. यावेळी जबाबदारीमध्येही वाढ झाली आहे. पण गेल्या वर्षीपेक्षा हा संघ अधिक भक्कम आहे. एरिकाबरोबर अझरबैजानचा जबरियिल हासनोव्ह आणि युक्रेनचा हल्क पावलो ओलिनिकसारखे दिग्गज खेळाडू संघात आहे. या सर्वानी ऑलिम्पिक पदक पटकावलेले आहे. त्यामुळे त्यांच्या अनुभवाचा संघाला चांगलाच फायदा होईल. प्रशिक्षकांकडेही चांगला अनुभव आहे. ऑलिम्पिकनंतर खेळाडूंनी विश्रांती घेतली होती, त्यामुळे ते कोणत्या लयीत आहेत, हेदेखील कळू शकेल.

* क्रिकेट आणि कबड्डी खेळातील लीगला चांगली प्रसिद्धी, ग्लॅमर मिळताना दिसत असले तरी तसे प्रो कुस्ती लीगच्या बाबतीत होताना दिसत नाही, याचे कारण काय वाटते?

पहिल्या वर्षी लीगची चांगली प्रसिद्धी झाली होती. बऱ्याच जणांनी ही लीग स्पर्धा पाहिली. या वर्षी ही स्पर्धा १५ डिसेंबरला होणार म्हणून जाहीर करण्यात आली होती. पण ऑलिम्पिकसाठी खेळाडू ४-५ वर्षे तयारी करत असतात. त्यामुळे ऑलिम्पिक झाल्यावर खेळाडूंना विश्रांतीची गरज असते. त्यामुळे त्या तारखेबाबत साशंकता होती. त्यामुळे ही स्पर्धा पुढे ढकलली गेली. यंदा लीगची जास्त जाहिरातही करता आली नाही. पण या लीगकडे कोणत्याही गोष्टीची कमतरता नाही. प्रसारमाध्यमे आता प्रसिद्धी देतच आहेत, पण त्यांनी यापेक्षा जास्त प्रसिद्धी या लीगला द्यायला हवी.