एअर इंडिया आणि भारत पेट्रोलियम या बलाढय़ संघांनी दोन्ही साखळी सामने जिंकून मुंबई महापौर चषक कबड्डी स्पध्रेच्या उपांत्यपूर्व फेरीतील प्रवेश निश्चित केला आहे. एअर इंडियाने प्रथम भाभा अणू संशोधन केंद्र संघाला ३२-१० असे सहज पराभूत केले, तर दुसऱ्या सामन्यात युनियन बँक ऑफ इंडियाचे आव्हान ३७-३४ असे परतवले. रोहित शेठ, तुषार पाटील आणि रवींद्र कुमावत यांच्या दमदार आक्रमणाच्या जोरावर एअर इंडियाने विजय निश्चित केला.
