न्यूझीलंडचा दिग्गज खेळाडू रॉस टेलरने आंतरराष्ट्रीय क्रिकेटला रामराम ठोकला आहे. ३७ वर्षीय रॉस टेलरने गुरुवारी सोशल मीडियावर पोस्ट शेअर करत निवृत्ती घेत असल्याचं जाहीर केलं. रॉस टेलरने आपल्या घरच्या मैदानावर होणाऱ्या पुढील दोन मालिका खेळण्याची इच्छा व्यक्त केली आहे. या दोन मालिका बांगलादेश आणि ऑस्ट्रेलियाविरोधात होणार आहेत.

सर्वात प्रथम न्यूझीलंड बांगलादेशविरोधात दोन कसोटी सामन्यांची मालिका खेळणार आहे. त्यानंतर न्यूझीलंडला त्यांच्यात मैदानावर ऑस्ट्रेलिया आणि नेदरलँडविरोधात पाच सामन्यांची मालिका खेळायची आहे. अशा परिस्थितीत ऑस्ट्रेलियाविरोधातील एकदिवसीय सामना रॉस टेलरचा अखेरचा सामना असू शकतो.

रॉस टेलरने ट्वीटमध्ये काय म्हटलं आहे –

रॉस टेलरने ट्वीट करताना म्हटलं आहे की, आज मी होम समरनंतर क्रिकेटमधून निवृत्ती घेत असल्याची घोषणा करतो. बांगलादेशविरोधात होणारी कसोटा मालिका आणि त्यानंतर ऑस्ट्रेलिया आणि नेदरलँडविरोधात सहा एकदिवसीय सामने शेवटचे असतील. १७ वर्ष मला पाठिंबा दिल्याबद्धल धन्यवाद. देशासाठी खेळणं माझ्यासाठी अभिमानाची बाब आहे.

रॉस टेलरचं करियर –

न्यूझीलंडच्या या खेळाडूने आपल्या आंतरराष्ट्रीय करिअरमध्ये एकूण ४४५ सामने खेळले आहेत. यामध्ये त्याने एकूण ४० शतकं केली आहेत. रॉस टेलरने ११० कसोटी सामन्यांमध्ये ७५८४ आणि २२३ एकदिवसीय सामन्यांमध्ये ८५८१ धावा केल्या आहेत. त्याच्या नावे १०२ टी-२० सामन्यांमध्ये १९०९ धावांची नोंद आहे. रॉस टेलरने कसोटीत १९ आणि एकदिवसीयमध्ये २१ शतकं केली आहेत. अजून दोन कसोटी आणि सहा एकदिवसीय सामने तो खेळणार आहे.