पाकिस्तानी क्रिकेटपटूला बलात्काराच्या आरोपावरून इंग्लंडमध्ये सामना सुरू असताना अटक, पीसीबीने केले निलंबित

ग्रेटर मँचेस्टर पोलिसांनी हैदर अलीच्या अटकेच्या वृत्ताला दुजोरा दिला आहे.

४ ऑगस्ट २०२५ रोजी बलात्काराची तक्रार दाखल करण्यात आली होती. २३ जुलै २०२५ रोजी मँचेस्टरमधील एका परिसरात सदर गुन्हा घडल्याचे सांगितले जाते. आरोपीला या प्रकरणी अटक करण्यात आली होती. मात्र पुढील तपास होईपर्यंत जामीन देण्यात आला आहे. दरम्यान पोलिसांनी आरोपीचे नाव सांगितले नाही. ब्रिटिश पोलीस प्राथमिक तपासाच्या टप्प्यावर आरोपीचे नाव जाहीर करत नाहीत.

पोलिसांच्या कारवाईनंतर पीसीबीने तात्काळ याची दखल घेत हैदर अलीला संघातून निलंबित केल्याची घोषणा केली आहे. पीसीबीने आपल्या निवेदनात म्हटले, “संघातील प्रत्येक खेळाडूच्या कल्याणासाठी आणि त्यांच्या कायदेशीर अधिकारांसाठी आम्ही कटिबद्ध आहोत. चौकशीच्या प्रक्रियेदरम्यान हैदर अलीला आवश्यक असलेली कायदेशीर मदत दिली जाईल.”

कोण आहे हैदर अली?

हैदर अलीने २०२० मध्ये आंतरराष्ट्रीय क्रिकेटमध्ये पदार्पण केले होते. त्याने पाकिस्तानच्या संघासाठी दोन एकदिवसीय सामने आणि ३५ टी-२० सामने खेळले होते. इंग्लंड दौऱ्यात पाकिस्तानच्या शाहीन स्कॉड या अ संघासाठी त्याची नुकतीच निवड झाली होती. इंग्लंडचा हा दौरा २२ जुलै रोजी सुरू झाला होता.

कायदेशीर प्रक्रिया पूर्ण झाल्यानंतर आचारसंहितेच्या नियमानुसार, पुढील कारवाई करण्याचा अधिकार राखून ठेवला असल्याचेही पीसीबने आपल्या निवेदनात म्हटले आहे.