यू मुंबाला नमवून पाटण्याची मुसंडी

दिमाखदार सांघिक कामगिरी बजावत पाटणा पायरेट्सने प्रथमच गतविजेत्या यू मुंबाचा ४०-२६ असा धुव्वा उडवून प्रो कबड्डी लीगमधील सलग तिसऱ्या विजयासह जोरदार मुसंडी मारली आहे. दुसऱ्या लढतीत तेलुगू टायटन्सने बंगळुरू बुल्सवर ३५-२६ असा दणदणीत विजय मिळवला.
सामन्याच्या दुसऱ्या मिनिटाला राजेश मोंडलने एका चढाईत चार गुण घेतल्यानंतर यू मुंबा संघाचा आत्मविश्वास हरवला आणि पाटण्याने त्यांच्यावर दोन लोण चढवले. मोंडल आणि प्रदीप नरवाल यांनी चढायांचे प्रत्येकी आठ गुण मिळवले. संदीप नरवाल, डी. सुरेश कुमार आणि सुनील कुमार यांनी अप्रतिम पकडी केल्या.