Pro Kabaddi Season 6 : दिल्ली ठरली दबंग, बंगाल वॉरियर्स पराभूत

दबंग दिल्लीने नवोदीत नवीन कुमारला आज चढाईसाठी संघात स्थान दिलं. नवीननेही आपल्यावर दाखवण्यात आलेला विश्वास सार्थ ठरवत 11 गुणांची कमाई केली. त्याला चंद्रन रणजितने 7 गुण मिळवून तोलामोलाची साथ दिली. या दोन्ही चढाईपटूंनी बंगालचा बचाव खिळखिळा करुन टाकला. या दोन्ही चढाईपटूंना उजवा कोपरारक्षक रविंदर पेहल आणि डावा कोपरारक्ष जोगिंदर नरवाल यांनी सर्वोत्तम साथ दिली.

दुसरीकडे बंगालच्या संघानेही चांगला खेळ केला. चढाईमध्ये जँग कून ली आणि मणिंदर सिंहने चांगले गुण मिळवले. या दोन्ही खेळाडूंना महेश गौडने चांगली साथ दिली, मात्र बंगालचे बचावपटू मोक्याच्या क्षणी गुण कमावू शकले नाही, ज्याचा फायदा घेत दिल्लीच्या संघाने सामन्यात 39-30 अशी बाजी मारली.