डेव्हिसपटू सोमदेव देववर्मनने दिल्ली खुल्या टेनिस स्पर्धेतील पुरुष गटाच्या उपांत्य फेरीत स्थान मिळवले आहे. मात्र भारताची अव्वल दर्जाची खेळाडू पुण्याच्या अंकिता रैनाला पराभवाचा धक्का बसला. सोमदेवने चीनच्या झेई झांग याच्याविरुद्ध ६-२ असा पहिला सेट जिंकला. मात्र त्यानंतर खांदा दुखावल्यामुळे झांग याने सामन्यातून माघार घेतली. सोमदेवने चेन्नई व कोलकाता येथील एटीपी स्पर्धामध्येही उपांत्य फेरी गाठली होती. महिलांच्या एकेरीत अंकिताने युक्रेनची खेळाडू युलिया बेगेलझिमेरला चिवट झुंज दिली. मात्र हा सामना तिला ३-६, ५-७ असा गमवावा लागला. दोन तास पाच मिनिटे चाललेल्या या लढतीत अंकिताने फोरहँडच्या ताकदवान फटक्यांचा बहारदार खेळ केला. मात्र दोन्ही सेटमध्ये तिची सव्र्हिस ब्रेक करण्यात युलिया हिला यश मिळाले.
