Sushil Kumar’s Bail Cancelled By Supreme Court: भारताचा ऑलिम्पिक पदक विजेता सुशील कुमार अडचणीत सापडला आहे. १३ ऑगस्टला सर्वोच्च न्यायालयाने ज्युनियर राष्ट्रीय कुस्ती चॅम्पियन सागर धनखड यांच्या हत्येतील प्रमुख आरोपी सुशील कुमारचा जामीन रद्द केला असून त्याला एका आठवड्यात पोलिसांसमोर हजर राहण्याचे आदेश दिले आहेत.
सुशील कुमार सागर धनखड यांच्या हत्येच्या आरोपाखाली बराच काळ तुरुंगात होता. या प्रकरणात त्याला दिल्ली उच्च न्यायालयाकडून जामीन मिळाला होता. पण आता सुशील कुमारला सर्वोच्च न्यायालयाकडून मोठा झटका बसला आहे. न्यायमूर्ती संजय करोल आणि प्रशांत कुमार मिश्रा यांच्या खंडपीठाने सुशील कुमारला जामीन देण्याचा दिल्ली उच्च न्यायालयाचा ४ मार्च रोजी दिलेला आदेश रद्द केला आहे.
भारताचा कुस्तीपटू सुशील कुमारला सुप्रीम कोर्टाचे सरेंडर होण्याचे आदेश
सागरचे वडील अशोक धनखड यांनी उच्च न्यायालयाने सुशील कुमारला दिलेल्या जामिनाच्या आदेशाविरोधात दाखल केलेल्या याचिकेवर हा निर्णय देण्यात आला. सर्वोच्च न्यायालयात अशोक धनखड यांच्यावतीने ज्येष्ठ वकील सिद्धार्थ मृदुल यांनी, तर सुशील कुमारच्या वतीने वकील महेश जेठमलानी यांनी बाजू मांडली. आता या प्रकरणात सर्वोच्च न्यायालयाने आपला निकाल दिला आहे.
सुशील कुमार सहकारी कुस्तीपटी सागर धनखडच्या हत्येप्रकरणी २०२१ पासून न्यायालयीन कोठडीत होता. खटल्याच्या प्रक्रियेत विलंब होत असल्याने दिल्ली उच्च न्यायालयाने मार्चमध्ये त्याला जामीन मंजूर केला होता. पण या प्रकरणाची चौकशी अजूनही सुरू आहे. यामुळे न्यायालयाने सुशील कुमारला एका आठवड्यात पुन्हा पोलिसांसमोर हजर राहण्याचे आदेश दिले आहेत.
कुस्तीच्या जगात प्रसिद्धी मिळवलेल्या सुशीलचे नाव एका खून प्रकरणात आल्याने देशाला याचा फटका बसला. २००८ च्या बीजिंग ऑलिंपिकमध्ये त्याने कुस्तीत कांस्यपदक आणि २०१२ च्या लंडन ऑलिंपिकमध्ये रौप्यपदक पटकावले होते. तो दोन ऑलिंपिक पदकं जिंकणारा पहिला भारतीय खेळाडू ठरला. आता या खून प्रकरणातील न्यायालयीन कार्यवाही अजूनही सुरू आहे आणि आता न्यायालय त्याच्याबाबत काय निर्णय देते हे पाहणं महत्त्वाचं ठरेल.
