टाटा स्टील बुद्धिबळ स्पर्धा : अर्जुनला उपविजेतेपद

भारताचा युवा ग्रँडमास्टर अर्जुन ईरिगियासीने टाटा स्टील बुद्धिबळ स्पर्धेत जलदगती (रॅपिड) प्रकाराच्या जेतेपदानंतर अतिजलद (ब्लिट्झ) प्रकारातही चमकदार कामगिरी करताना उपविजेतेपद मिळवले.

पीटीआय, कोलकाता

भारताचा युवा ग्रँडमास्टर अर्जुन ईरिगियासीने टाटा स्टील बुद्धिबळ स्पर्धेत जलदगती (रॅपिड) प्रकाराच्या जेतेपदानंतर अतिजलद (ब्लिट्झ) प्रकारातही चमकदार कामगिरी करताना उपविजेतेपद मिळवले.

अर्जुनने शनिवारी अतिजलद प्रकारात नऊ फेऱ्यांअंती ६.५ गुणांसह अव्वल स्थान मिळवले. रविवारीही त्याने चांगला खेळ सुरू ठेवला. मात्र, त्याच्याप्रमाणेच जागतिक क्रमवारीत चौथ्या स्थानी असलेल्या लेव्हॉन अरोनियननेही झुंजार खेळ केला. त्यामुळे एकूण १८ फेऱ्यांअंती अर्जुन आणि अरोनियन या दोघांचेही ११.५ असे समान गुण होते. ही बरोबरीची कोंडी फोडण्यासाठी टायब्रेकर खेळवण्यात आला.

यात अर्जुनने आक्रमण केले, पण अरोनियनने तितकाच चांगला बचाव केल्याने पहिल्या गेमअंती बरोबरी कायम राहिली. त्यामुळे अरमागेदोन डाव खेळवण्यात आला. यामध्ये पांढऱ्या प्याद्यांसह खेळताना अरोनियनने विजय मिळवत टाटा स्टील बुद्धिबळ स्पर्धेच्या अतिजलद प्रकाराचे जेतेपद पटकावले. अधिबनने आरोग्याच्या कारणास्तव माघार घेतल्याने त्याच्या जागी अर्जुनला प्रवेश देण्यात आला आणि त्याने या संधीचे सोने केले. याआधी अर्जुनने अरोनियनलाच बरोबरीत रोखत जलदगती प्रकारात जेतेपद मिळवले.

अतिजलद प्रकारात भारताच्या  निहाल सरिनने ११ गुणांसह चौथा, तर डी. गुकेशने १० गुणांसह पाचवा क्रमांक पटकावला. तसेच रौनक साधवानी (८ गुण), विदित गुजराथी (६.५ गुण) आणि द्रोणावल्ली हरिका (४ गुण) यांचा अव्वल दहामध्ये क्रमांक लागला.

Loksatta Telegram लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

मराठीतील सर्व क्रीडा बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App. ताज्या बातम्या (latest News) फेसबुक , ट्विटरवरही वाचता येतील.

Web Title: Tata steel chess tournament arjun ysh

Next Story
रसिका , सारा , सुधांशु, आदित्य यांची विजयी सलामी